學習台語
iat 容易變音做 ik
台語唸 -iat (-iet / et) 韻母个字，下一代个儂容易聽做 -ik (-iək) 个音。
「piat籤詩」變「pik籤詩」
親像古早講【別[piat]籤詩】（台日典下冊p.680），現代台語差不多攏講做 【pik 籤詩】，發生音變了後，講話者理解个意思也綴咧變做是「逼籤詩」。
「別」字台語文音本底有兩讀
「別」--字台語文音本來有分第四聲 piat 佮第八聲 piat8，對應無仝意思。
「分辨、區分」个意思，像【辨別 piān-piat】、【區別 khu-piat】 唸第四聲 piat。
「別」用佇「另外--个」佮「離開、告別」个意思才唸第八聲 pia̍t， 像【別莊 pia̍t-tsong】是家己平常咧蹛以外，「另外」蓄[hak]、「另外」起个一棟厝； 【別名 pia̍t-miâ】、【別號 pia̍t-hō】个「別」也是「另外」个意思。 【特別 ti̍k-pia̍t】就是佮普通--个無仝，有「另外」个特色个存在。
【辭別 sî-pia̍t】就是佮儂相辭[sio-sî]來離開，【別世 pia̍t-sè】是離開世間， 【離別 lī-pia̍t】就是離開，佮儂分開。
所以「分別」按怎唸，本來是愛看意思：「分別」若是「區別」个意思， 就唸 hun-piat，像「基本个是非[sī-hui]愛會曉分別」（台日典干焦收即種意思个 hun-piat）； 「分別」若是「離別」个意思，就唸 hun-pia̍t，親像「佇機場佮愛人仔分別[hun-pia̍t]， 心酸目睭罩烏雲」。
「別」字文音有兩讀，佇蔡培火 《Cha̍p-hāng Koán-kiàn》冊裡有真濟實例， 十七年前我捌寫過一篇論文討論過。
總是「別」字文音兩調，正經歹學習，汝凊彩對古詩文內底提一个有「別」 字个兩字詞來考--我，我可能嘛著想--一睏仔。各位會使將台日典內底 「別」字唸 piat 佮 piat8 个詞，分別摘出來，攏讀過一擺，可能印象就會較深刻， 而且咱會發現，唸 piat8 个詞加足濟。現代台語，已經西瓜倚大爿，將「別」 文音一律唸第八調 pia̍t 矣。這也致使【別[piat]籤詩】个本音本義愈歹分會[hun-huē]矣。
「折磨」變音
【折磨 tsiat-buâ】真濟儂攏講做 tsik-buâ，台語現代流行歌通做證。
「哲」--字古今音
「柯文哲」个「哲」，古早正音是 tiat，日本時代後期以來，台灣儂大概是予日文 「哲」--字唸 てつ 个影響，「哲」个台語音漸漸變做 thiat。
教會公報个作者，雖然攏寫白話字投稿，毋過怹个漢文底致也是真好 （教會學校內底有請漢文先生咧教漢文），我佇教會公報資料庫查 tiat-hak8（哲學）即个和製漢語，有揣著 88 篇文章：
查詢 tiat-hak8 結果：
1910年代： 3 篇
1920年代： 11 篇
1930年代： 34 篇
1940年代： 11 篇
1950年代： 21 篇
1960年代： 19 篇
計共： 99 篇
若用 thiat-hak8 去查，就完全查無。
毋過，我讀高中个時，聽著阮老爸（1928年出世）講起「哲學」即个詞， 伊就唸做 thiat-hak8 矣。
柯文哲怹老母也是講「阮文哲[Bûn-thiat]--仔」。其他閣有真濟例， 攏顯示目前台灣个老年層慣勢唸【哲 thiat】，知影唸【哲 tiat】--个大概是少數。
毋過，若予較少年--个 thiat 佮 tiat 二選一，怹可能會選 tiat，因為「哲」 華語音是聲母無送氣个ㄓㄜˊ，怹不知不覺就會曉去類推出台語音个聲母多數也是無送氣。
最近佇電視政論節目真 tshìng 个王義川先生，1972 年出世，台南佳里儂， 柯老母講 Bûn-thiat--á 即个音，聽入去伊个耳空，閣出伊个喙就變做 Bûn-thik--á。 這就是本文一開始所講 iat 變 ik 个例在內。
若主持人呂惠敏是講 Bûn-tiat--á，顛倒是比柯老母較古个正音， 這可能是我頂兩段所講對華語類推出來个結果。呂小姐佮王義川大概是仝沿个。
學習日記
讀一屑仔 JapanesePod101.
生活記事
今仔日戴家母去潮州予鄭漢醫看，提一禮拜份个藥仔，有用煎个佮藥粉。
Comments powered by Disqus.