阿元新語107
龜毛是堅持干焦家己感覺正確个事物；
頂真是堅持別儂嘛攏感覺正確个事物。
朗讀集訓
Tsa̋ng 2023 年 10 月 11 日去嘉義市，共朗讀代表集訓，是今年第一回。
國小組个指導老師講黃同學平時講話小可仔大舌，為著朗讀賽，付出足大个努力， 拚勢練習，才提著代表權。咱著共黃同學大大呵咾--一聲！
國中組个指導老師是郭乃文老師，原來就是今年高中組朗讀稿第八篇〈番麥〉个作者！
我 10 月 10 號有佇面冊寫講（用教典漢字）：
今年語文競賽台語朗讀稿高中組第八篇〈番麥〉，作者郭乃文小姐有寫著講：
會記得仝梯的一个同學家境無偌好，伊的學費、生活費攏愛家己拚、家己趁， 閣愛奉待𪜶(in)阿祖。
「仝梯[the]」一般是指做兵仝梯次[the-tshù]，但是伊文章內是咧講伊讀大學的代誌， 而且伊畢業了後考著教職，可見佮做兵無底代。伊佇遮用「仝梯」無妥當， 上好改做「仝屆[kài]」較理想。
請有熟似郭乃文小姐的朋友，共伊通知一下，毋知我有誤解伊的意思無？感謝！
補充：
仝一批允入去仝一間公司食頭路的同事，互相也會講是「仝梯的」。 學校內仝屆的同學，可能漸漸有一寡仔人會按呢用，總–是， 這猶毋是通行的講法，上好毋通寫入去有示範作用的朗讀稿。 「仝屆」欲戲稱做「仝梯」，朗讀稿上好加引號，但是伊遮都看袂出來有 「戲稱」的目的，所以我判斷是誤用。
當面請教郭老師了後，才知影伊讀冊个時，學校个好朋友來厝裡拜訪， 郭小姐怹阿舅就會共伊講：「恁仝梯--个來揣汝矣！」郭老師就按呢 形成一个語感：仝屆个學生內底，相好个朋友，會使叫做「仝梯--个」。
這是怹阿舅一種半講笑个用法，就我佇學校佮社會个台語經驗判斷， 並毋是「仝梯--个」正常个用途。佇較嚴肅个語境，像〈番麥〉 文內迄段，無適合按呢講，若無，真容易引起誤解。 像我將頂面所寫鋪佇面冊了後，就有留言問講，作者是毋是讀軍校系統个？ （準是軍校嘛應該講仝期、抑是仝年班）
也有面友 A-Ka 留言講：
我進前大學讀東華大學原民院（2015 - 2020），彼陣就聽著同學（原民生） 咧講仝一屆的同學，會叫「仝梯 kâng-the（毋過in無學過台文， 所以攏會寫火星文「港貼」），彼時拄接觸，就感覺真心適， 而且這嘛毋是干焦阮彼屆有，前幾屆就開始有矣。
叫仝屆好友「仝梯--个」就是互相之間个暱稱，正式語境，上好寫 「仝屆--个」、「仝年級--个」、「仝屆好友」、「仝班--个」、 「同窗」等等。
Comments powered by Disqus.