面冊通知講，2023 年 11 月 13 日欲刪除我个網誌(Facebook Note)个內容資料。
面冊是一步仔一步咧關閉網誌。先禁止佇網誌鋪新文，了後閣取消功能表个網誌連結， 致到使用者著愛知影網誌某一篇文个網址才有法度閣看著迄篇文。Tann 伊展出最後一招： 閣一個月後，面冊就欲徹底刣捒網誌矣。
今年 4 月 18 號，我有佇新站遮鋪出一篇〈潘科元面冊網誌(Facebook Note)文章總表〉。 我迄陣本底是向望利用面冊提供个管理功能，將網誌鋪文備份去 Google Docs，了後才整理、 搬徙過來新站遮。無疑悟迄項備份功能根本袂使得備份面冊網誌个文章， 干焦有篇目佮網址爾爾。總是，按呢也真寶貴矣，用即步我才有法度將我个面冊網誌鋪文 攏總列表出來，將即篇文章總表佇本站冠頂（排列佇首頁最新文章列表个上頭前）。
遮个面冊網誌文，有袂少篇，過去我已經整合過來我个部落閣矣，但是到底佗幾篇猶未整合， 我一直茫茫渺渺。趁即个整理總表个機會，我另外過濾出一个 fb-only.txt 个文字檔， 列出猶未整合過來个文章。一目𥍉半冬過去，無閣進一步處理矣。
Tann 無容允我閣無作為矣。一個月後面冊就會刪捒網誌，按呢我即篇文章總表个連結 就會全部失效去。我著 sī-suā，一個月內將即 304 篇面冊網誌文當中 156 篇左右猶未整合過來个， 攏總遷徙予好。
目前个工作流程是利用 Chrome Plugin “Markdownload” 一篇仔一篇將文、圖攏掠落來， 簡單編輯，測試一下，了後 git add/commit/push，上傳去 GitHub。
朋友講揣袂著伊過去佇 Facebook 所寫个「網誌」文章。「面冊網誌」是面冊个舊功能， 會用得寫長文，佮動態「貼文」無仝。
以下說明按怎將家己个面冊網誌文章揣轉來。
Facebook 目前提供兩種法度，一種是「移轉資訊副本」，利用家己个 Google 口座个 Google Docs 來掠面冊个鋪文抑是網誌。
幾個月前我試，即種功能干焦會使得掠標題佮網址，即馬會使得掠完整个文字（有分段）佮圖片矣。 但是煞失落標題，也無包含原網誌文个網址矣：
一種是用面冊本身个下載功能「下載個人檔案資訊」。這會使掠網誌標題、文字佮圖片， 但是無保留段落格式，圖片也會徙去文字下底，袂保留佇原底插入圖片个所在：
https://www.facebook.com/dyi/?referrer=yfi_settings
針對網誌備份，會記得「選擇資訊類型」个時，「你在 Facebook 上的動態」內底愛點 「查看全部」，了後選列表siōng下底个「其他動態」，到時下載落來，點兩下 start_here.html 才看會著「網誌」个超連結。
以上兩種方法著愛配合使用才好處理。
Comments powered by Disqus.