對Facebook遐轉貼我2011-04-11寫个文字：
拄才接受一位大姊个邀請了後，小弟佇facebook所交陪个朋友到今[tann]足足滿500位。網路頂个我卡袂見笑，心肝內想講：「為著欲予閣卡濟儂看著『用心、講究』个台語文生做啥乜款，只要我感覺對方有台灣意識、語言意識，我著愛盡量主動去佮伊做朋友。」
facebook个設計，利便進行個別抑是群體个互動，所致我雖然拄用facebook無幾個月，但是我佇遮佮逐家所進行个討論，交流，已經大大超過我進前佇blog幾若年久个累積。
不而過，儂講：一好佮一啀，無兩好通相排[Tsi̍t-hó kah tsi̍t-gâi, bô nn̄g-hó thang sio-pâi]。facebook雖罔卡方便儂即時互動，但是舊文字真僫揣，儂嘛無迄號精神去píng出來看，尤其是google嘛搜揣 [tshiau-tshuē]袂著，等一講，咱用心計較佇facebook所發表个物件，將來恐驚攏「船過水無痕」。
後來，我發展出一種做法。先踮facebook發表，得著逐家个指教了後，才閣khóo-phih (copy) 過去我佇 xuite 个網誌（舊站佇https://blog.xuite.net/khoguan/blog，2023年設新站佇https://taigi.page），進一步修削、補添，保存比較卡完整、正確个內容。
而且，facebook傷過頭開放个群體互動，朋友一下交濟，毋但出現資訊超載个問題，閣卡惱氣[lóo-khì]个是「糞埽超載」，一大堆低路、情色个廣告佮無聊、無品个應用程式訊息、標記，充滿佇動態消息个版面。愛了袂少精神來刪除、過濾。咱若將朋友个分類做予卡幼咧，按照分類來看訊息，對 應付即種困擾加減仔有補所。（2023-05-13補註：「分類」个連結失效，刪除。）
總講一句，網路時代个儂，愈來愈愛行「短路」，亦著是卡愛 緊捷快[kín-tsia̍p-khuài]个溝通，「一句來、一句去」，想著啥，現講現應，卡無咧三思[sàm-su]。文字著袂幼路、袂深沈，心理嘛卡浮漂[phû-phiò]、躁性[sò-sìng]。咱三不五時，嘛著暫且離開網路，翻頭加讀一寡紙本冊，三斤青草仔煉做一碗，「厚積而薄 發」[hiō-tsik jî po̍k-huat]，攑筆來寬寬仔寫文章。
Comments powered by Disqus.