Monday 到 Sunday 个台語，上完整个講法是：
禮拜一[lé-pài-it]、禮拜二[jī]、禮拜三[sann]、禮拜四[sì]、禮拜五[gōo]、禮拜六[la̍k]、禮拜日[ji̍t]。
但是一般攏簡化，講：
拜一[pài-it]、拜二、拜三、拜四、拜五、拜六、禮拜[lé-pài]。
請注意最後是「禮拜」，毋是「拜日」。佮「拜一」到「拜六」个簡化法無仝。例：「今仔日拜五，後--日禮拜，阮欲去peh山。」
「拜日」个講法，是少年儂个「新發明」。汝若按呢講，證明汝猶閣少年，真好^^
即套用詞个年齡層差別是按呢：老年个台灣儂攏知影完整講法佮簡稱；中年个台灣儂可能只會曉簡稱；少年个往往就講「拜日」講甲真自然。一禮拜有一工愛「拜日」，一個月有一工愛「拜月」。這算是台灣个「新風俗」XD （滾耍笑，請毋通掠做真）。
嘛會使講：星期一[sing-kî-it]、星期二[sing-kî-jī]、星期三[sann]、星期四[sì]、星期五[gōo]、星期六[la̍k]、星期日[ji̍t]。這逐家攏聽有，總--是，毋是真正个生活用語，佇電台廣播才卡捷聽著。
聽講有儂無佮意「禮拜」，想講伊to無「落教 lo̍h-kàu」，哪有咧「禮拜」？咱著想講，即種分日子个方式，本來就是西洋傳來个宗教生活方式，按呢講只是顯示出伊个來源，毋是按呢講就是愛去做禮拜，心胸毋通遐狹[e̍h]^^
「禮拜」有時指七工个週期，有時指「禮拜日」，看頂下句佮語境決定。干焦會曉講「禮拜」，袂曉講「禮拜日」个朋友，請加學即个本來就有个完整講法。「禮拜日」意思卡明確，有時卡好用，像「拜六个禮拜，伊袂來，禮拜日才會來。」若講做「拜六个禮拜伊袂來，禮拜才會來」咁毋是真花？
Comments powered by Disqus.