iOS app 个退費條款

咱所買个 iPhone、iPad 軟體(app)，照目前 Apple 公司个契約書來看，佇七工內會用得退貨、退錢。但是這毋是一開始就有个，是因為台北市政府法規會葉慶元个堅持，Apple 才明文修改契約書，提供咱台灣消費者即條權益。

佇維基百科「手機付費APP軟體鑑賞期事件」即條，有提起「iOS平台原本是30天內可以寫信退費，在台灣市場，改變成7天內申訴退款。」，按呢看起來，顛倒變做對咱卡不利。

但是我查著英國版个 App Store 條款，並無予儂佇30工內寫批退回 app 个條文，干焦寫講，「一旦開始下載軟體，買賣就完成，除非下載出問題，若無，袂使退貨」。別儂實際要求退費个經驗講，是愛寫批去解說無愛个理由，Apple無的確欲接受。

話講倒轉，葉慶元嘛予 Android 个使用者罵甲臭頭，自迄陣到今，Android Market 一直無閣對台灣開放。

有儂主張「軟體袂使退貨，若會使，按呢電影、音樂、電子冊看看聽聽咧，毋是攏會使退？」但是軟體佮電影無仝，軟體是需要一再使用个物件，我三不五時會買著一寡軟體，愛試用幾點鐘以後，才有法度判斷好用歹用，Android 干焦予儂試用 15 分鐘，實在無夠。

問題是，App 包山包海，內底啥乜性質个資料攏有，所以真歹界定。