本來个台語，以下兩種講法，無仝意思：
一、「kap 伊去」，kap 變調變高短調。華語「跟他一起去」。
二、「kah 伊去」，kah 變調變高降調。華語「叫他去、吩咐他去」。
後來第一種个 kap 入聲韻尾 -p 發生音韻學所講个「弱化」，致使 kap 變做 kah。所以咱目今咧講「kah伊去」煞著看語境來判斷到底是頂面兩種个佗一種意思。
第一種个「kap / kah」，漢字寫做「佮」。
第二種个「kah」，漢字本源可能是「教 kà」，毋過"kà"是「教導」，可比先生、師傅"kà"--咱，咱愛學、愛練；但是"kah"是「叫、吩咐[huan-hù]」，可比父母"kah"--咱，咱著聽喙、順趁。"kà"、"kah"意思有分化，漢字無適合攏寫「教」，若無，會花[hue]去。請注意，即種「kah」，與「佮意 kah-ì」、「佮貨 kah-huè」、「佮目 kah-ba̍k」、「佮嫁妝 kah-kè-tsng」、「食魚食肉，嘛著菜佮 [tsia̍h-hî tsia̍h-bah, mā tio̍h tshài-kah」个「佮 kah」無仝款。
吩咐个「kah」，兩个常用个合成詞：
一、「央kah」，泉腔講 iong-kah、漳腔講 iang-kah。央[iong/iang]就是「央託 iong/iang-thok」个意思，所以「央kah」就是「央託、吩咐」。 單字動詞「央」台語嘛有咧用，像「央儂去辦」。
比較：
「央」是去拜託儂，有時愛姑情伊。咱若卡無立場，就著去「央」--儂。
「kah」是交代、吩咐，咱若有立場、地位，自然會使 kah別儂去替咱辦啥事。
例句：即个議員有影好央kah，選民有啥困難去揣伊，攏會共咱設法。
二、「差kah」。「差」唸 tshe，也就是「差遣 tshe-khián」个「差」。"tshe-kah"就是「差派、吩咐」。「差」、「kah」意思差不多，但是予儂「差[tshe]」去做啥事，往往帶有一種職務性。
囡仔無事惹事，事後 後悔、吼疼啦，老母就罵講：「Siáng kah--汝啊？！」，意思是無儂要求--汝，汝家治討皮疼。這毋是講「Siáng kà--lí 啊？！」
華語罵講「活該」，咱台語若講「死 好！」按呢傷歹聽，老母袂按呢對囝講，即陣應該講「Siáng kah--汝啊！」
有友志賜教，怹拄著即種情形，是講「Siáng kà--汝啊」。雖然按呢嘛有可能，但是因為「Siáng kah--汝啊」个"kah"後壁接低調輕聲字「汝」，迄个本調"kah"會拖卡長、嘛紲降落去，聽起來有影佮「kà」足歹分。
建議咱閣去問卡清楚咧。問个時，先講出汝慣勢个講法，像講：「序大儂罵囡仔『Siáng kà--汝啊』是咧講『啥儂共汝kà』？抑是『啥儂共汝kah』？」用本調予老大儂選，就知影怹到底是講 kà，抑是 kah。
Comments powered by Disqus.