Kia̍t-ga̍k 兄回應我「一義三詞」迄篇講：「SARS hit時，gún hia (台中縣庒kha所在) ê lâng kā "chhùi-tà" 叫做 "chhùi-lam"。有台文前輩講he 是"chhùi-am" ê 音走精--去，我giâu疑giâu疑。Taⁿ，準若"chhùi-am"是hit時chiah發明--ê，án-ne，講是走音就bē通--a；應當有別種語源。」即个問題，我來開破 [khui-phuà] 看昧：
tshùi-lam 是對「牛-tshùi-lam」變化過來指儂塊掛个 mask，毋是 tshùi-am 个走音。
另外，「小貪 [siáu-tham] nǹg 雞-am」，嘛會使講「雞-lam」。am 佮 lam 對即个詞來講兩可。
台日典，有收「牛-tshùi-lam」、「牛-tshùi-kê」、「雞 am」、「雞 lam」，毋閣無「牛-tshùi-am」。
照我个語感共拆明，講 "tshùi-am"，是用物件共喙 am 起來，"am" 佇遮「名詞化」去，形成一个「單字名詞＋單字動詞」所構造个複合名詞。抑講 "tshùi-lam"，是塊講一種親像 lam-a2，掛佇喙裡个物件，是一个「單字名詞＋單字名詞」所形成个複合詞。
"lam" 單字，會使做名詞（「鳥仔放出 lam」），嘛可以做動詞（「用雞-tà lam 雞仔）。"am" 單字干那「動詞」个用法。
閣來，"am" 單字並無「籠仔」个名詞意思，是按怎有「雞-am」个詞；抑「雞-lam」个 lam 毋才有「籠仔」个意思，所以「雞-am」是走音？我無卜按呢說 [sueh]。"am" 單字雖罔無「籠仔」个路用，毋閣伊个本義是 jia-khàm，引申義蓋儕，包括「保護、庇護、幫助」即種意思，親像「am 全家 [ke] 會得過」、「我塊做即號生理是伊 am 我个」（伊出卡儕本錢）。即个「雞-am」个講法就是對「保護」个意思來用个－－「雞-am」卜做保護雞仔囝个路用。
按呢看來，「牛-tshùi-lam」無講「牛-tshùi-am」嘛真有理氣。即種物件毋是塊保護牛个，是卜用一个「籠仔形」个 lam仔，共牛个喙「封」起來，勿予伊損斷 [sńg-tn̄g] 農作物。
即馬已經罕得看著牛，況兼 [hòng-kiam] 是「牛喙-lam」，毋閣「狗喙-lam」就不時有凍看。我嘛捌佇大街路邊看過「羊喙-lam」。遮个攏是卜「制限」 tsing-sinn 个喙，勿予 in 「見青著 sà、見烏著咬 [kā]」。
對「牛-tshùi-lam」變化做 "tshùi-lam"，已經無管伊原底迄種「制限」个作用，主要是取伊平平是「掛佇喙裡个物件」即種共同點來講，而且嘛共款是卜「封喙」个路用。
所以，講來講去攏講會通。上好勿隨意講民間个語言是 tsua̍h音 :-)
mask 有个扁扁薄薄，有个 tēng-tēng 厚厚、立體个（N95 ?）。扁薄形个，thang 叫做「喙-am」；立體个，thang 叫做「喙-lam」抑是「喙罩 [tàm]」。按呢無共語源个台語同義詞會凍予伊卡幼路來分開意思。歡迎讀者進一步閣來區別 [khu-piat]「喙-lam」佮「喙罩」 :-)
suà 喙尾：
晉前寫个文，有時會出現鬥句个話，即篇嘛有。有个是歸句新想个，有个是對古早話轉化來个，若知影「典故」，閣卡有款曲 [khuán-khiok]。
「見 [kìnn] 青著 sà，見烏著咬 [kā]」是對「見烏著觸 [tak]」變化出來个，變做兩句鬥句話。sà 是動詞，真好食款、sâi-tsia̍h款佇塊食物件个意思。
古早俗語「見烏著觸」是塊講，有个牛仔欠教示，見著烏影著卜觸，比喻人類个各種行為，包括無分皂白 [tsō-pe̍h] 共儂歹、亂投資、事業亂創。
台灣愈來愈少「見烏著觸」个牛，毋閣愈來愈儕「見青著 sà，見烏著咬」个人。
此去，我會閣致意即方面，別日仔 thang 來做一本「潘氏新編台灣心適鬥句話」。
Comments powered by Disqus.