穿[tshng]、迵[thàng]、軁[nǹg]、鑽[tsǹg]、揻[ui]、貫[kǹg]、轆[lak]，即寡台語動詞，意思重疊[tîng-tha̍h]，主要意義攏是指某種物件進入細細个空[khang]，但是有幼路个分別。舉例來講卡實在：
一、「穿針 tshng-tsiam、穿篙 tshng-ko」
迄个空本來著佇遐，咱才用物件共伊穿過。用線穿過針鼻[tsiam-phīnn]（華語「針眼」），著是「穿針」；用衫褲个手䘼空[tshiú-ńg-khang]，抑是褲跤穿[tshng]過竹篙來披衫个方式（無用鋏仔、衫弓仔），叫做「穿篙」。
請注意，推薦用字700字內底，所收个「穿 tshīng」是「穿衫 tshīng-sann」个 tshīng，佮佇遮所講个 tshng 無共款。照講「穿」文言音是 tshuan，親像「穿鑿附會 tshuan-tsho̍k hū-huē」；白話音是佇遮討論个 tshng。「穿」並無 tshīng 个音，台語 tshīng-sann 寫做「穿衫」，是考慮社會接受度才採取个「訓用字」。
二、「冷風迵[thàng]過裘仔[hiû-á]、即條路迵台東、規年迵天[kui-nî-thàng-thinn]」
「迵 thàng」有「通過有厚度个阻擋物、有長度个空間/時間」，重點是對即頭到迄頭，中央有物件隔椆咧。
三、「軁磅空 nǹg pōng-khang、軁轎跤 nǹg kiō-kha、軁跤縫 nǹg kha-phāng」：
「軁」个意味，有包含講「身軀愛ànn低」才入去个感覺。無論是磅空、轎跤、橋跤、跤縫（跨下）、桌仔跤，攏用「軁」个，因為身軀愛ànn低。咱駛車軁過橋跤，著準實際上毋免ànn低，但是猶原有迄種隨時準備欲ànn低个心理。
四、「鑽空 tsǹg-khang、鑽仔 tsǹg-á」
本來無「空」个物件，共伊鑽空，有破壞著原來个物件。「鑽」--出來个「空」無一定有規个迵--過。動詞「鑽 tsǹg」加上「仔」變成名詞，一種咧鑽空个家私。
五、「軁鑽 nǹg-tsǹg」
兩个單字動詞「軁」+「鑽」變成雙字動詞，意思抽象化，類似華語講个〔鑽營〕。可比「某儂𠢕[gâu]軁鑽，儂面闊，政商關係真好。」「軁」像頂面所講，身軀愛ànn落去，佇遮著是比喻肯 ànn腰去巴結、姑情儂；「鑽」是比喻本來無空[khang]、無關係，硬鑽空入去、扑出關係。即个「軁鑽」實在是足精彩个台語詞！
六、「揻空[ui-khang]、心肝親像針咧揻、揻揻鑽[ui-ui-tsǹg]」
「揻」嘛是「鑽」，但是卡強調用「細閣尖」个物件「反覆旋轉」或者是「一直改變角度」想盡辦法欲kā鑽出一空。因為按呢，所以定定用來形容身體上、心理上所受--著，親像予針利个物件、毒蟲、歹代誌傷害，一陣過一陣劇烈个痛苦。嘛才講「揻揻鑽」，用兩个「揻」來加強「鑽」个感受个強度。
七、「貫空 kǹg-khang、貫耳仔 kǹg hīnn-á、貫鼻 kǹg-phīnn、貫喙䫌 kǹg tshuì-phué、錢貫 tsînn-kǹg」
「貫 kǹg」是一種「鑽 tsǹg」，強調「有迵--過」。所以欲掛耳鉤，若講：先去予儂「鑽耳仔 tsǹg hīnn-á」，按呢無夠精密，因為「鑽」無一定有規个迵--過，愛講「貫耳仔 kǹg hīnn-á」（華語〔穿耳洞〕，華語个講法，無像台語分甲遐幼）。
以早作穡个牛，攏著「貫鼻」。但是即馬个時派男女，佇家治身軀貫鼻，掛鼻鉤，是咧愛媠，阮老派个看著真袂做--得，毋知美感佇佗位。
「貫喙䫌」是童乩定定咧「表演」个項目。
「錢貫」是名詞，古早个銀角仔，中央刁工做空，用「錢貫」索仔共一堆銀角仔貫起來，卡袂散掖掖[iā-iā]。
八、「轆空 lak-khang、轆鑽 lak-tsǹg、轆鏇 lak-suān、轆榫空 lak sún-khang、扭轆 liú-lak」
「轆」是一種「鑽」，用「不斷轉踅[tńg-se̍h]」个方式來鑽空，無一定有迵--過。教育部辭典寫「戮」--字，我感覺無啥妥當，所以採取《台日大辭典》个寫法。
「轆鑽、轆鏇」著是專門做即種工課个家私。「轆榫空」是用「轆鑽」轆出「榫空」，thang-á來「接榫 tsiap-sún」，是做家具个過程。
「扭轆」是單字動詞「扭」+「轆」，兩字攏有包含「轉踅」个動作。「扭」佇遮會使看做是向咱身軀个方向來轉踅；「轆」是離開咱身軀个方向。兩種對反方向个「轉踅」，合做伙，表示想盡辦法來處理、應付、解決代誌。「歹扭轆」著是真歹處理、歹hua̍t-lo̍h。
這推薦用字是寫做「扭搦 liú-la̍k」，音無共款。伊第二字个「搦 la̍k」是第八聲，我寫个是照《台日大辭典》所記錄个，第二字是第四聲个講法。《台日新辭書》嘛是記 liú-lak，但是意思是指 liú-lia̍h（扭掠）。
以上所講，推薦用字文件有出現个字是「迵 thàng、軁 nǹg、鑽 tsǹg、揻 ui」，賰个佇教育部線上辭典查會著，小部份佮我个用字有出入个所在，我攏有注明矣。
Comments powered by Disqus.