廈門話 tsī-tsuī 是疑問詞「啥儂」个意思
chī-chuī (tsī-tsuī) 是廈門話白話字文獻不時看會著个詞，目前台語無通行， 長老教會个會友就較知，台日典有收 tsī-tsuī-á，漢字伊寫「是誰仔」， 意思就是疑問詞「啥儂」。本文欲探討 tsī-tsuī 个漢字可能是「底誰」。
tsī-tsuī 佇現時廈門已經罕用
一禮拜前我佇面冊鋪文分享白話字囡仔冊 Iù-tī Khò-pún 个新舊版比較。 有廈門面友來反映講廈門即馬無咧講 tsī-tsuī，是講 sinnh-mih-lâng。 我私訊問閩南話高手林建輝先生，伊回寫：
林建輝推測 tsī-tsuī 語源
廈門70以下的罕得聽著，故較老的有時猶會講，總是，即个詞猶未完全死失。 漳州北部聽著是chi7-choa5。漳州南部的雲霄縣講ti7-choe5。所以，我推測 chi7-ch5/ch7是ti7-ch**來類化的。
ti7-choe5的頭字，佮ti7-lang5、ti7時、ti7-tang時，是同一字。 類化的過程，拍算親像 龍眼，leng5-geng2 變 geng5-geng2
先師漳州莊先生講 tsī-tsuī-á
我贊成建輝兄个見解，應講：
阮漢文先生莊世光老師是清朝尾出世个漳州儂，伊不時會講 chī-chūi-á。 我判斷廈門話文獻个 chī-chūi 是對漳州傳來个，清尾民初个廈門閣不時聽會著， 但是現代廈門儂已經改用較有普遍性个閩南話疑問詞講法矣。
目今台灣一般儂毋捌 tsī-tsuī-á，干焦看台日典有收即个詞，可能僫接受， 佳哉我有機會當面聽著漳州過台灣个莊老師[Tsng ló-su]按呢講。類似个例毋但這。 咱無必要賭強切斷台灣話佮閩南話个關係，若無，真濟台語舊文獻个內容就讀袂通， 也無法度對台語現存各種腔口个變化，提出合理个解說。
tsuâ 佮 tsiâ
建輝兄寫：
嗯。漳北的chi7-choa5，較濟主張是chi7-chui7-a2連音而成。
著啦，故有儂講cha5/chia5，大概是佇當今漳北角美、廈門海滄彼角勢。 我聽台中儂講話也有即號腔
我寫：
台語漳腔有講 chiâ 佮 chôa 單音節，無頭前个 chi7 檳城福建話講 chūi-chūi
綜合起來，語源大概就是「底誰」。
「底誰」音變過程擬測
底誰 *tī-tsuî
前音節聲母 t 予後音節聲母 ts 同化 ⇨ tsī-tsuî
後音節第五聲予前音節第七聲同化 ⇨ tsī-tsuī
前音節韻母 i 予後音節雙元音韻母 ui 同化 ⇨ tsuī-tsuī
tī 佮 tsuî 个詞性佮意義
tī（泉腔第六聲、漳廈腔混同第七聲）是疑問詞，例詞有 tī-tāi、tī-lâng、tī-sî， 漢字是「底事、底儂、底時」，對應英語 what / who / when 等个概念。 （閣一个疑問詞是 guā/juā/luā，本字是「何」，例詞有 guā tsē/tsuē、guā長……等等， 對應英語 how much/many、how long 等个概念。
tsuî 本身就是疑問詞，是 who 个意思，頭前加上通用疑問詞 tī，是加強語氣。
台日典佮閩方典寫「是誰（仔）」
話講倒轉，台日典寫「是誰仔」，《闽南方言大词典》p.10 也認為是「是誰」 （以下引文將原冊調號改做白話字式，簡體字也改用繁體字，按呢版面較清爽）：
【(是)誰】(廈) tsī-tsuī (泉) sǐ-tsuì (漳) tsī-tsua̍h 誰。“是誰”的音變 [sī-suî ➞ tsī-tsuī, tsuī]。(漳)是“是誰啊”的合音音變[sī-suî-á ➞ tsī-tsua̍h] 或[tsua̍h]：伊是～？｜～先來的？｜即本冊～的？
「誰」唸 tsuî 保存佇南管
咧做南管先生个朋友共我講「誰」字𪜶唸 tsuî，我看這就是「誰」个白話音， 頂面引文將「誰」文音 suî 當做語源就較無通。
《當代泉州音字彙》p.179「誰」字兩音：suî、又音 tsuī。
tsua̍h 是 tsuâ 个變體抑是誤記
另外，閩南方言大詞典將即个詞个漳腔記做 tsī-tsua̍h，是按怎後字會變做第八聲 -h8 咧？ 伊解說漳腔講法來自 sī-suî-á 合音音變，這合音起來哪會走對第八聲去？ 頭前我引用林建輝先生所寫漳北是講 tsī-tsuâ 毋是 tsua̍h，漳南雲霄是 tī-tsuê， 兩種漳腔講法後字攏是第五聲啊。
這是因為漳腔 -h8 是低升調，漳腔第五聲也是低升調，所以兩種調真容易糊混去。 阮漢文先生莊老師也有即種現象，伊捌將某一个第五聲个開音節字（我袂記得是佗一字矣） 佇呼八音个時安對第八聲去。可能有寡漳腔儂講 tsī-tsuâ，有寡漳腔儂變音做 tsī-tsua̍h； 嘛有可能是閩南方言大詞典个記音者聽了無明，將 tsuâ 標做 tsua̍h 去。
比較台灣漳腔講閣愈清楚，台灣漳腔 -h8 是中平調，佮第五聲低升調差真濟， 台灣漳腔个 -h8 干焦有可能濫對第七聲去，袂佮第五聲混同。 閣來，台灣有寡漳腔區是講單音節 tsuâ 來表示「啥儂」个意思。 閣綜合頂面漳州林建輝先生所記，閩南方言大詞典記做 tsī-tsua̍h 就較輸記做 tsī-tsuâ。
收尾話
tsī-tsuī 个漢字毋管是「是誰」抑是「底誰」，對一般台語文使用者來講無啥重要， 畢竟即个詞本身台灣無時行，連閩南也漸漸罕得聽見矣。總是，扑算 透過以上个說明佮分析， 讀者加減仔會得學著一寡台語佮閩南語个智識。
Comments powered by Disqus.