台語本調、變調「多對一」無平衡个系統本質

有友志賜教講：「〇〇市這擺的台語演說初賽，有一個評審特別講著『資源回收』的『源』愛變調，我念來念去攏感覺無變調較順，毋知潘老師的看法是按怎？」

恐驚即位評審先生所根據个「台語變調規則」是用有限个語料，進行過度類推來一概而論个結果，並無認清台語个「完整个實相」。

「資源#回收」，「源」唸本調才是「自然、合宜、予儂聽會明」个唸法啦！

即種對「書面語」來个語詞，應該唸予慢，而且本調个字愛卡濟咧，唸个儂才好唸，聽个儂才好理解。

台語四字詞个變調現象，扑死儂複雜。「資源#回收」「田野#調查」「環境#保護」遮个書面新名詞，伊个結構是「兩字名詞+兩字動詞」所形成个四字動名詞，上好佇第二字唸本調，予伊自然來拖長--小可仔。（當然袂使像逗點、頓點停遐久）

可比咱本身是學者、研究生，咧做「田野調查」个儂，互相之間定定提起即个詞，講久了後，慣勢將「野」唸變調，這無要緊。但是面對一般儂咧講話，「野」猶原愛唸本調才好溝通。也就是講，台語四字詞个變調，毋是絕對个，該當看款「熟用度」來選擇。

閣舉別種構詞个例，像報氣象个到今[tann]攏講「南部#地區」「北部#地區」「屏東#地區」「高雄#地區」，這無好，即種儂儂知个地區名、縣市名，講遐久矣，前三字應該攏變調才自然。

但是若像電台賣藥仔咧講指定藥房「正新#藥房」「如神#藥房」，咱聽著任何一个主持人佇第二字攏嘛唸本調，按呢真好！因為予儂足明確知影這[tse]兩字个藥房名，尾字个本調。

若予所謂个「變調規則」縛死去，堅持「正新藥房」、「如神藥房」攏著親像「台灣大學」按呢，前三字攏愛變調。按呢干焦是白白來增加聽眾个困擾：「到底即間藥房是叫做『正新』，抑是『正神』？Ah迄間藥房是叫做『如新』，抑是『如神』藥房？」

台語變調了後，原底本調有分个字，有一部份會變做分袂出來，這包括：

一、「漳腔第一、第五攏變第七聲，像『豬頭、鋤頭』」；

二、「泉腔第五、第七聲攏變第三聲，像『王朝、旺椆』」；

三、「-h4 佮 第三聲攏變第二聲，像『借路、照路』」；

四、「-h8 佮第七聲攏變第三聲，像『食白[pe̍h]飯』、『食爸[pē]飯、穿母裘[hiû]』」

另外閣有「仔前變調」所造成个混同，彼就愈濟啦！

即種台語本調、變調「多對一」無平衡个系統本質，造成台語儂个語感，拄著生疏、書面、詩句、文言个時，卡傾向選讀本調來避免「不解」佮「誤解」。即種傾向，無學過「變調規則」个漢文先生儂儂會曉得，但是現代个「台語評審」無幾个解說有路來。

聯想：「自然个民謠」經過音樂學者「記譜」進入教室內，無疑眾儂煞予「定譜」縛死去，袂記得「古早自然个唱法」。

「自然个台語」經過語言學者整理出「本調、變調規則」進入教室內，無疑眾儂煞予「變調律」縛死去，袂記得「古早自然个講法」。

這就是我所看著，會thang予咱對照反省个兩種現象。

補充，頭前我講「用有限个語料，進行過度類推來一概而論」，佇遮具體舉例：

「我是屏東囡仔」、「伊娶一个日本婆仔」「俗語講：澎湖查某，台灣牛」，咱根據遮个語料，類推出一條變調律：「拄著『兩字地名+兩字人物名』个構詞，意思指某所在个人物个時，地名个尾字一律愛變調」。

一概而論：所以「拳#打#南山#猛虎#；跤#踢#北海#蛟龍#」（# 頭前迄字唸本調）即个賣藥仔廣告按呢唸毋著，「南山」个「山」、「北海」个「海」攏愛改唸變調才著。

歹勢--honnh，咱激一个語言學家个氣頭[khuì-thâu]，去否定儂代代相傳个活語言，只是露現出家治研究了無徹[thiat]爾爾。

「屏東囡仔、日本婆仔、澎湖查查」是白話口語；但是迄兩句賣藥仔話，是半文言个聯對詩句，即兩種个語言風格，有本質上个差別，所致台語儂才採用無仝个「變調策略」來「處理」。

無了解即點，咱嘛無法度理解老輩讀冊儂讀古文个變調方式，是按怎會遐濟所在違背口語變調規則，無變調，唸本調（像「孟子#見#梁惠王」个「見」是唸本調），煞嘛來否定怹。

(2012-09-18 facebook)