扑算

扑算[phah-sǹg]，至少有兩種意思。一種等一[tíng-it]是北仔話个【打算】，這台語嘛有講「按算」；另外一種是表示講話者塊臆[ioh]、揣測[tshuí-tshik]，是「大概、可能」个意思。第一種意思个呼音，照一般个變調規則，第二種个「算」，一盡[it-tsīn]讀本調。

「伊扑算卜來」，「算」若講變調，就是「伊家治有按算卜來」；「算」若保持本調，彼著無共款，是講話者塊臆講，「伊大概有卜來」。

第二種个「扑算」，南部蓋tsia̍p講連音：phang31-ng11...。

「錢伊扑算毋還我」，「算」變調--者，就是「伊錢按算無卜還我」；「算」若本調，就是「我塊想，伊錢可能毋還我」。

對按呢，咱會thang知影，干那標「調類」（親像教羅、TLPA）个系統，無法度處理即種問題。抑若是只是標「實調」个系統，另外有別款弊病[pē/pè-pīng]。卡理想个做法扑算是佇主要元音个頂頭標「調類」，閣佇愛讀本調个音節後壁另外做號頭。大常標點符號所隔開个上尾字，就是本調（若是輕聲，另外有輕聲符號來分別，免操煩），所以迄搭毋免閣加啥麼記認，主要是句中个本調字卡著張持。特別註明本調，無特別註明變調个原因是，數量來講，變調个字，比本調个字加足儕，所以號明是本調卡省符號。

這不過是初步个思量[niû]，毋閣按呢个方向不止大要緊。咱所設个符號，愛有一種卡十全[tsa̍p-tsn̂g]个體系，thang予正式、ka-nn̂g个台語文出版品來採用。卜保存台灣話語个精妙，的確著按呢tsiah著。

現時个台羅議定者，íng-íng是拘執[khu-tsip]佇教羅个傳統做法--裡，全然無按算卜ǹg即个方向去求進步，真扑損。

「扑算」閣有卡單純个「考慮、思量」个意思。「在[tsāi]我扑算，…」，相當是文言文个「竊以為[tshiap-í-uî]」，帶有故謙个口氣。「扑算」，會使拆開用，可比「隨儂扑隨儂个算」、「的確毋thang扑毋著算」。即種用法，台灣目今poh-tiānn廢無去矣。

台語嘛有「打算[tánn-suàn / sǹg]」。