「劑」字台語音小考
「藥劑」佮「藥劑師」个「劑」無仝音
台語「藥劑」佮「藥劑師」即兩个詞當中个「劑」个呼音，我細漢聽著--个就有出入矣： 「藥劑」是 io̍h-tse，「藥劑師」是 io̍h-tsè-su。「劑」佇兩字詞「藥劑」个時，唸 tse 第一聲；但是加一字「師」，變成三字詞个時，煞改唸第三聲 tsè。教典有收「藥劑」 佮「藥劑師」，伊所記个音正正反映出我一向所聽著个。
不過，其他有用著「劑」字个詞，我聽過个攏唸 tse，像：【殺草劑 sat-tsháu-tse】、 【防腐劑 hông-hú-tse】、【鎮靜劑 tìn-tsīng-tse】，教典也是按呢記。
若是唸第三聲 tsè 个詞，教典除了「藥劑師」以外，閣收一个【劑量 tsè-liōng】。 即个詞我過去無特別用台語講過，欲叫我講，可能也會按呢唸。
教典按怎定位「劑」个兩種呼音？
教典單字詞將【劑 tse】歸佇俗音，伊也有收【劑 tsè】字，就無特別注明文、白、俗、替， 按照教典个體例，就表示教典認為「劑」唸 tsè 是正音。
日本時代按怎唸「藥劑師」？
台日典(1931)有收【藥劑師 io̍h-tse-su】，伊注明這是來自日語， 請注意即个三字詞个「劑」伊唸 tse，佮當今通行音 tsè 無仝。 台日典無收【藥劑】。
教會公報 io̍h-che-su 出現過 16 篇，io̍h-chè-su 出現過 5 篇。
查詢 ioh8-che-su 結果：
1910年代： 1 篇
1920年代： 1 篇
1930年代： 3 篇
1940年代： 3 篇
1950年代： 1 篇
1960年代： 7 篇
計共： 16 篇
查詢 ioh8-che3-su 結果：
1930年代： 1 篇
1940年代： 2 篇
1960年代： 2 篇
計共： 5 篇
教會公報無出現過兩字詞 io̍h-che 抑是 io̍h-chè，這佮咱佇台日典觀察著个情形一致！
將遮个統計資料顯示个年代佮出現率排列比較起來，咱thang講：「藥劑師」 即个日語漢字詞，本底是唸 io̍h-tse-su，到日本時代後期漸漸有唸做 io̍h-tsè-su 个現象，到阮細漢 1970 年代以後，io̍h-tsè-su 就變做絕對優勢音矣。
io̍h-tse-su 按怎變做 io̍h-tsè-su？
變音个因素，一方面可能是台語儂將「劑」字當做字形倚近个「救濟、賑濟」个「濟」 个仝音字，一方面是華語勢力入來台灣，閣再加速即種變化，因為華語是講ーㄠˋ ㄐーˋ ㄕ， 戰後讀華語冊大漢个台語儂真容易綴咧將台語「藥劑師」个「劑」變調做高降調。
總是，「藥劑」个台語音猶原保持 io̍h-tse。
教會公報有寫著 tiau-che（調劑）
教會公報个作者有寫著一个心適个詞：tiau-che，總共有 8 篇文。對前後文來看， 咱就判斷會出來，作者寫 tiau-che 是咧講「調劑」、「包藥仔」即種醫藥用語， 𪜶無寫著「調劑身心」迄種意思。
傳統台語字典「劑」唯一音 tse
咱查甘字典、彙音寶鑑，就會發現，其實「劑」字干焦一音 tse 爾爾， 並無 tsè 个音。甘字典【劑 che】解說是：
chhiat-pîⁿ, chián-pîⁿ, chhòng-khì hó-sè；io̍h-thiap.
對應个漢字就是「切平，剪平，創去好勢；藥帖」。「劑」个造字理路是「齊」+「刀」， 這是形聲兼會意字，原意就是用「刀」共物件切予整「齊」。咧處理漢藥材个過程中， 不時需要用刀切齊个動作，大概因為按呢，才產生「藥劑」連結个用法，一帖藥、 一擺服用个藥量也叫做「一劑」。
彙音寶鑑【劑 che】个解說是：「分也 藥也」。
康熙字典「劑」字有平聲佮去聲个讀法，平聲是「遵為切」，去聲是「在詣切」。 「遵為切」是 tsui，韻母佮台語 tse 有出入，毋過攏是陰平聲，若是「在詣切」 因為是全濁聲母，反切出來个台語音應該是 tsē 陽去調，毋是 tsè 陰去調。
小結論：「劑」唸 tsè 毋是啥乜正音
對中古音，到台語字書，到台日典一路落來，tsè 從來毋是「劑」字个正音， 到教典才變做預設个正音，這通講是綴華語音个聲調來類推台語聲調个結果。
無論按怎，兩字詞「藥劑」，咱今仔日猶原閣講 io̍h-tse，這就是咱个正音， 教典也是有尊存，咱毋免刁工改唸做 io̍h-tsè 來佮「藥劑師」个現代音求一致。
像武漢肺炎个預防射，干焦注一擺無夠，一擺注「一劑」，過幾月日仔，閣注一劑。 我聽儂講台語咧討論家己已經注過「三劑」、「四劑」等等，𪜶就是唸 tse，毋是 tsè。
「藥劑」、「藥渣」仝音
但是按呢做了後，台語「藥渣」佮「藥劑」毋就仝音矣？是按呢無錯。 台日典有收【藥渣 io̍h-tse】，第一義指 tsuann 第二遍个藥仔（漢藥、青草仔）， 第二義指 tsuann--過了後留落來，無藥效个藥材。
「藥渣」有近義詞「藥粕」通代替
佇某種語境之下，講「藥渣」可能會予儂誤會做是「藥劑」，佳哉咱閣有別个詞通講： 【藥粕 io̍h-phoh】，即个詞昨昏我就有聽著家母講起。
其實【渣 tse】對咱現代台語儂來講，已經變做是無啥語感个詞素矣， 講「藥粕」才較好理解、
Comments powered by Disqus.