一台斤十六兩，非十進位，咁毋是真歹算錢？

以早咱民間擔蔥賣菜、賣魚賣肉个小生理儂，無咧攑筆、也無用算盤算錢，當然閣較無迄種會自動算出偌重、幾圓个電子秤，怹攏是含口算[hâm-kháu-sǹg]爾爾。

但是咱儂咧稱重，是用台制：一斤十六兩、半斤八兩，即種「非十進位」个重聲[tāng-siann]。

接受中華民國義務教育大漢个我，一直想袂曉，遮爾歹算个斤聲，咱个鄉親到底是按怎心算个？

可比講，一斤80箍，按呢 12 兩重个肉就是 80 * 12/16 = 80 * 3/4 = (80/4) * 3 = 60，連用紙筆來算都足複雜，毋知怹是按怎一瞬間就算會出來？即題答案是整數，猶是算簡單个，若是 7 兩、11 兩，即種个，毋是愈頭疼？

即陣想起來，一斤十六兩，這實在就是「二進位」个變化，16 是 2 个 4 次方，怹可能攏是「對半」閣「對半」按呢一直算落去，16 對半是 8，8 對半是 4，4 對半是 2，2 對半是 1，才閣看是雙數抑是奇數[khia-sòo]，了後去掠算金額。所以頂面个例 12 兩是 8 兩 + 4 兩，價數就是 80 箍對半个 40 箍閣加上對半个 20 箍就是 60 箍啦。閣親像 7 兩 著算 8 兩 減 1 兩个錢，11 兩是 8 + 2 + 1 抑是 16 - 4 - 1。

咱台灣鄉親个腦神經線，穩當有予外星儂偷絞「生化數位電路」入去，才會遐gâu算！

（原來發表佇Facebook 2016-06-17）