一頭擔雞 雙頭啼

欲來講一句台灣高級俗語：一頭擔雞雙頭啼 [tsi̍t-thâu tann ke, siang-thâu thî]

用扁擔[pún/pín-tann] 擔物件，一擔[tànn]有雙頭，一頭是雞，是按怎會雙頭攏啼？無講出來个另外一頭是幼囝，形容艱苦儂出門辛苦討趁，嘛著將囡仔擔[tann]出去，哪賣雞，哪顧囝。像即馬咧排商展、夜市仔个儂，定定攏著𤆬[tshuā]囡仔出去趕場，幼嬰仔著愛飼奶，卡大漢个，就予伊踮邊--仔屈咧做功課。

嘛有儂講做「一擔[tànn]擔雞雙頭啼」「一肩[king]擔雞雙頭啼」，按呢个講法，修辭卡單純，就是指家庭負擔沈重[tîm-tāng]，一雙手骨欲飼一家[ke]口。

毋過，「一頭擔雞雙頭啼」，有另外一種用法：是指雙跤踏雙船，尤其是汝若厝內已經有某（一頭擔雞，公開个），閣佇外口鬥伙計（另外一頭是啥，毋敢予儂知）。一旦代誌出破，抑是伙計仔毋願，欲討「公道」，吵落去到塊[kàu-tè]，雙頭攏佮汝反[píng]（雙頭啼）。時到才知影「是害儂縫，毋是暢空」[sī hāi-lâng-phāng, m̄-sī thiòng-khang]，吼疼嘛袂赴囉。

「扁擔 pún-tann」个台語，第一字个講法足濟種：pún/pun/pín/pin/pínn（我是寫本調，講个時，愛閣變調）。會記得我細漢是綴儂講 pùn-tann。

蔡振南[Tshuà Tsín-lâm]作曲个「花若離枝」，有唱著「一肩擔雞雙頭啼」。