【上廁所】个台語

即篇來收集、討論一寡「去便所」个台語講法，徛算是晉前一篇「廁所」个續集。迄篇有講過个，即篇著無閣提起。

放尿[pàng-jiō]、小便[sió-piān]；放屎[pàng-sái]、大便[tāi-piān]。讀者扑算會想講「小便、大便」是對華語來个。毋閣，1931-32年个《台日大辭典》著有收即兩个詞矣，伊閣註明是「國」語，彼是日本語，毋是支那語。亦著是講，台語是先對日語詞个漢字吸收遮个詞，用台語來呼音。這毋知會使算做是日語佮華語个共通詞袂？總是，學來學去，流出去閣流倒轉，這著是偉大閣恐怖个「漢字文化圈[khuân]」个大勢力，用漢字來生湠新詞足利便。

抑若「便所」，彼著是台語學日語，但是華語無个詞。

 有一點值得閣講究，《台日典》收个「小便[siáu-piān]、大便[tāi-piān]」，「小」佮「大」攏讀文言音。按呢真對同[tuì-tâng]。無像現時通行个講法，「小便」个「小」用白話音 sió，「大便」个「大」才用文言音 tāi。我毋是形式主義者，要求相對應个詞，著愛統一採用文音抑是話音來唸，千變萬化个台語kà-hiah簡單？毋閣以即對詞來講，有影會使反應一个事實，著是現代台灣儂對「小」个讀冊音愈來愈生份去矣，用著siáu个所在一直減無去。強卜只偆一个「君子、小人」才唸siáu矣。

閣比一例，日本姓「小林」用台語唸，愛讀文音 siáu-lîm，毋閣我頂日仔聽「小林眼鏡」佇電台塊廣告，唸做 sió-lîm，煞變做是華語佇儂姓頭前加一个【小】--字表示卡隨便、卡親切，【小陳、小王、小吳】迄種稱呼个台語化。

見若是正名，有用著「小」--字，台語該當讀 siáu，除非是偏名、小名、外號。像「陸小曼[lio̍k-siáu-bân]」、「鄧小平[tīng-siáu-pîng]」。

歹勢離題去，閣轉來講【上廁所】其他个台語詞，閣有「落礐[lo̍h-ha̍k]、上礐[tsiūnn-ha̍k]、上廁[tsiūnn-tshè]、落廁[lo̍h-tshè]、走動[tsáu-tāng]、出恭[tshut-kiong]」。遮个詞風格攏無啥仝。「礐」卡白，「廁」卡文。攏會凍配搭動詞「落」抑是「上[tsiūnn]」，「落」佮「上」本身是相對个動詞，毋閣佇遮配起來，意思攏共款！（台語「上船[tsiūnn-tsûn」佮「落船」[lo̍h-tsûn]舊底嘛共意思。）毋閣，比較的[tik]，「落礐」、「上廁」大概卡常用。另外，所謂卡文，無定規是「文言音」，以現代民主價值觀來論，嘛無影著卡貴氣，總是攏是咱个資產，攏值得保惜。《台日大辭典》佮《台日新辭書》攏有「上廁」，無「上廁所」，即點我佮意 ^^ 毋免像華語按呢加講一字。

即篇先按呢，有閒繼續。