"用著siáu个所在一直減無去"
我個人的感覺啦，有可能是因為佮"痟"的音仝，一般人聽較袂慣...("痟"林目鏡？廣告一定袂安呢講)
我一直恬恬[tiām-tiām]塊觀察台語衰亡个過程，靜靜塊感受每一代个台灣儂對台語語音、意義个語感變化。
漢語个共音字太儕。因為共音个關係，予儂聯想對別款意思去，彼真四常。毋閣，咱若挓[the̍h]上hiau-pai个北仔話佮衰尾个台語來比較，現拄現著會看著真不平个現象佮心態。
像我以早提个例，雖然平平攏是共音字，台灣儂用北仔話講「使、駛……」个時，講著真慣勢、自在，並袂聯想對「屎」去；是按怎愈來愈儕台灣儂講著「駛車」，煞會想對「屎車」去？
這牽涉著足複雜个社會心理、語言心理。其中一个因素，我想是因為台語个失勢，佇各種場合个使用，直透萎縮[uí-siok]去，愈下勻[ē-ûn]个台灣儂，愈無機會活佇卡完整个台語環境內。用"siáu"舉例，佇伊有限个語言學習佮接觸範圍內底，佮"siáu"个音產生聯結个，差不多攏完全偆即个「痟」个意思niā-niā。本底雖是有足儕「小[siáu]」--起頭个詞（請查線上台日典看昧，有82筆！），多數是卡高級、或是卡文言个台語詞，佇遮，卡高級是講卡進階(advanced)个程度佮年歲才學會著个，卡文言是講是對冊裡抑是正式場合才學卡會著个。
我看，迄一大堆內底，干那偆「小人[siáu-jîn]」一般儂卡會曉耳。亦著是講，雖然閣會曉佇卜講「小人」个時陣，唸出正確个"siáu"个音，而且聯想對正確个「小」个意義，袂想對「痟」去。總是，「小[siáu]」佇姻頭殼內个語言智識，已經無才調成做[tsiânn-tsò]一个活詞素(free morpheme)，會凍佮其他个詞素結合做儕儕个台語詞。保持活詞素地位个siáu个音，僅僅[kīn-kīn]有即个「痟」niâ。
姻接觸--著个台語環境佮經驗，無夠額予姻會凍對一堆共音字內底，隨个仔隨个，去聯結著該當相應个意思。
結果就是像一蕊花所講个迄款語言心理出現矣。
究竟著是因為台語廢墜[huì-tuī]，台灣儂个語言失教育來所致[tì]（遮講个教育，是全面性个教育，毋是單獨塊講學房[o̍h-pâng]內个教育）。共音个詞素，歸堆崩敗去，只偆一半个仔極常用，閣再予儂認定是粗俗意思个詞素留--塊。
台語音比北仔話明明有重倍儕个音節數，但是汝咱自細漢培養起來个語感，感受袂著即種豐富性所會凍帶予咱，佇表達風格上，迄種多層次个可能性。只有感覺台語講起來、聽起來哪會攏真粗魯？！
Comments powered by Disqus.