美國有至少一千萬以上个文盲，雖然英語講甲sià-sià叫，但是英文看攏無。台灣咧？會曉講台語个儂，恐驚有 99% 以上攏是袂曉「讀寫」台語文个青盲牛！閣卡可悲个是，怹煞無感覺做一个「現代國家个母語青盲牛」有啥乜無正常。看著正式个漢字台語文，一寡台語儂看無，毋肯學習，干那用怹長期使用華語文，先入為主个觀念、認捌，起性地來攻擊台語漢字。
低路个媒體（親像即篇〈教育部台語辭典 霧煞煞看嘸〉），嘛再三加強即種錯誤觀念，怹認定「會曉講台語，無需要學習，就應該讀有台語文」。怹完全毋知影北京話文還北京話文、台語文還台語文。親像德文還德文、英文還英文，即兩種語文有密切關係，但是攏愛經過長期个學習，才有法度使用對方个文字。
美國逐日咧講英語个文盲，共款讀無英文啦！
因為台灣儂 母語、母語文 失教育，想欲寫台語，毋過無學過个儂，只好亂寫、亂鬥，隨儂烏白寫。但是專家、學者研究出來，卡理想、正確个一套寫法，顛倒予儂罵講看無。
教育部推薦用字 700 字，絕大部份攏相當嚴謹，有學術根據，嘛兼顧現代社會適用性。像頂面媒體批評講至少400字有問題，彼是干那會曉北京話文，根本無研究過台語文个儂，見笑轉受氣，無知無識个講法。
我毋是講推薦用字700字，抑是收詞閣卡濟个教育部台語辭典攏是正確个。我嘛無贊成 niáu-tshí 寫做「鳥鼠」、káu-hiā 寫做「狗蟻」，但是無論汝欲贊成，抑是反對，攏請汝先下工夫去學習、研究了後，才來發表意見。
可比講，連北京話有「媽、麻、馬、罵」四聲攏毋知影，汝有啥資格批評北京話个文字？請問，汝連台語有幾種聲調都毋捌，汝哪有可能了解 制定台語文字背後个道理？
制定閩台語漢字予社會使用，毋是干焦[ta]考慮「本字个稽考」，愛考慮个層次真複雜。教育部有出一份簡單个選字原則說明。
針對所採用个每一字，另外有「用字解析」。但是「用字解析」猶未將700字全部解析完，會繼續閣出。
欲真正瞭解，甚至進一步論斷伊个解析咁有正確、妥當，對台語學、漢語聲韻學（包括文字、訓詁）、漢語方言學等等，攏愛有相當个素養。
Comments powered by Disqus.