中華民國政府真愛蹧躂弱勢者

欲做一个中華民國个街頭藝人，著愛逐縣巿分開去參加一年一擺、甚至兩年才一擺个認證！

佇開放个公共場所用肉聲彈琴唱歌，是言論自由，也是基本人權，我認為根本無應該予國家機器來束縛。街頭藝人个生活，已經有夠卑微，無賣票，倚靠過路儂个欣賞佮好意，趁幾箍銀仔食飯坐車。是按怎著予政府管制甲即款？

即種走唱[tsáu-tshiàng]个儂，古早有予儂叫做「大本乞食 tuā-pún-khit-tsia̍h」（才藝是怹予儂偷袂去个大本錢），現代叫卡好聽，變做「街頭藝人」。想真，怹个處境其實比帝王專制時代閣卡悲慘，愈無自由、愈歹生存。

用代先審查來確保出版物个品質，佮用代先認證來確保表演个水準，攏是戒嚴心態。

思想佮藝術攏需要自由个塗壤、流通个空氣，才會釘根旺欉。當今台灣个民間藝術，已經强欲絕種[tse̍h-tsíng]。政府即種分縣市兩年辦一擺認證个法規，對發展民間藝術，損斷卡大過幫贈[tsān]！

中央政府講這是地方自治，無愛tshap；地方政府為著官府家治方便，寧可刁難弱勢者。想欲倚靠走唱來維生个儂，著愛等到兩年後个認證，煞活活餓死。