毋通講「客儂仔、客話仔」，愛講「客儂、客話」

去參加歌仔册研討會，發表者大部份講台語，這是好現象。但是其中有一位教授提起「客儂、客話」个時，攏加一个尾字「仔」，講做「客儂仔、客話仔」。

這對客家族群真失禮，敬請逐家以後毋通閣按呢講，講「客儂、客家儂、客話、客家話」就好，勿閣加「仔」。

台語詞尾「仔」用法真濟款，本意是指幼囝（人類、動物），像囡仔、紅嬰仔、豬仔；也通表示親密感，像阿玉仔、阿吉仔；擴大用來表示細項物，像廟仔；抑是將動詞轉做名詞，表示家私頭仔，像鑽仔[tsǹg-á]、攕仔[tshiám-á]。

但是若用佇族群、職業名稱，帶有真强个輕視意味。像阿六仔（台灣輕視中國儂个稱呼）、台灣仔（中國東南沿海輕視台灣儂个稱呼）、日本仔、警察仔、做戲仔。

我相信迄位教授無歹意，但是整體个社會是按呢咧「定義」「仔」个用法（約定俗成），咱著細膩！