中華電信123服務

敲 123 中華電信問電話錢自動轉數[siàu]个問題。伊一開始个電腦語音會問咱欲愛〔國語服務〕抑是「台語服務」，攏是先錄好个聲音用軟體去組合个。

伊台語唸上差个是電話號碼，聲調烏白鬥，外包个電腦公司袂曉運用台語本調、變調个智識去設計。另外就是「網路 bāng-lōo」攏講做「蠓路 báng-lōo」，真低路。

最後接到服務人員遐，怹毋管咱拄才是揤國語服務抑是台語服務，攏一律先講華語自報字姓：

〔您好，敝姓張簡，很高興為您服務〕。

咦，即个姓真奇巧，閣較奇个是，伊紲落來就主動佮我講台語，講了滑遛[ku̍t-liù]--無打緊，聲音閣好聽，有播音員个水準，服務態度也非常好。

了後上網查著，姓雙姓「張簡 Tiunn-kán」个儂，真濟是高雄大寮儂，有一段知恩報本[ti-in pò-pún]个故事。

註：「雙姓」毋是「複姓」，是本來兩个獨立个姓，因為某乜因緣合做伙，像「張簡、張廖、范姜、周黃、江謝、……」。這佮「冠夫姓」也無仝。「複姓」是「複數字姓」，也就是毋是較平常个「單字姓」，像「歐陽、司馬、諸葛、公孫……」，是一開始就是兩字，甚至有兩字以上。

蕭藤村老師來賜教講，「張、廖、簡」即三姓因為淵源深，所以無相疊親。