予中國黨黨工蹧躂个小經驗

中國國民黨黨工為著個人个安全佮利益，迫害無辜个學生，我嘛有小小个經驗。

我讀政大，暑假去參加救國團舉辦个戲劇訓練營，是一个阮叫伊「李大哥」个中國黨工咧管營隊。

開幕式進前，李大哥有先交代逐家，長官致詞个時毋通睏。

到時陣，我就一直寫筆記，凊彩記伊講个廢話，當做咧練字。但是有學員佇台跤盹龜[tuh-ku]，大官欲結束个時，真無歡喜唸講有儂無專心。徛佇台邊个李大哥緊張甲欲死，目睭掃對台跤，煞掠準頭殼向[ànn]低低咧寫字个我，就是盹龜个學生。

開幕式結束，李大哥叫我過去，惡khia̍k-khia̍k，生瞋[tshinn-tsin]問我拄仔咧創啥，我講我咧寫筆記，伊毋信，煞起性地，將我手裡个筆記本搶過去，對我个頭殼頂大力mau落去。

後來伊掀筆記起來看，雄雄發覺家己失態，才聲說放軟，為伊家己辯解，也講好話安慰我，我食菜儂、修忍辱，無愛佮伊反[píng]，就準拄煞。

但是了後我佇營隊內迄幾工，心情就親像關佇監獄仝款。