人生如夢

有儂講，人生親像一場夢。若在我想，人生毋是一場夢，是重重疊疊[tîng-tîng tha̍h-tha̍h]，一重包一重个夢。

咧陷眠个時，真討厭迄个夢境，想講已經精神過來矣，但是後來才發現，㨰踜[kùn-lìng]規晡，只是閣進入另外一个夢境內底，有時經過幾落重，最後才清醒。

但是，目睭前咧扑電腦寫批个我，咁正實[tsiann-si̍t]醒矣？抑是猶原閣佇某一个夢中咧？

即个問題，目前我無解答。毋過，照我个經驗，心不隨境來轉，有幫助。佇惡夢當中，若知影通[thang]瞌目[kheh-ba̍k]，勿看、免管，專心唸佛，即時就會凍脫離迄个夢境。

這無限定啥乜宗教，按照個人个信仰去做就好。