做兵無了時

阮少年時代，鄉親的觀念，普遍看袂起無做過兵的查埔儂，感覺無做兵受操練過，就無算轉大儂。

也會憢疑[giâu-gî] 伊身體敢[kánn]是有各樣[koh-iūnn]，才會無去做兵，所以就毋敢共查某囝做--伊，查某囡仔本身也毋敢嫁--伊。

時代直直演變，相信做兵是咧浪費性命个儂愈來愈濟。目今个女方家庭，大概已經袂計較男方咁捌做過兵，只要儂勇勇、袂歹囝、有正經頭路、查某囝佮意就好囉。

總--是，永遠有一種不平个心理閣佇咧，就是平平是查埔儂，是按怎恁爸[pē]愛去做兵，汝就毋免?

即種不平、窮分[khîng-hun]个心理，佇軍中義務役个士兵中間上強烈，仝梯个袂堪得看著別儂佇遐扑茫[phah-bâng]，家己煞忝uainn-uainn。Pha數較懸个學長，閣較袂容允學弟仔 日子過了比家己迄當時較爽。

但是一旦簽落去，變做志願役，種種有形無形个【權利】【福利】就講袂盡，義務役个攏毋敢加[ke]講話，若傷白目，佇言語、態度各方面去惹得志願役个，汝著知死！