傳承祖語是咱个責任

二十年前，閣不時有儂怨嘆講，台灣个少年父母攏毋肯佮囝講母語，害囡仔轉去故鄉个時，阿公阿媽咧講啥，孫仔攏像鴨仔聽雷。

時代「進步」，今[tann]無仝啦，多數个阿公阿媽攏歡歡喜喜對孫仔講「台灣國語」，甘願予孫仔佮怹个同學恥笑。因為阿公阿媽足煩惱孫仔佇學校功課綴儂袂著，所以愛量早佮孫講國語，勿講「無路用」个台語。

阮欲懇求遮个父母、阿公阿媽攏愛對囡仔講台語。因為序大儂有義務將祖先个話語傳落去，袂使剝奪囡仔學習祖語、母語个基本人權。

現代雖是多元社會，需要多語能力，但是若無用母語做基礎來發展多語能力，咱个心靈無根蒂[kin-tì]、無法度連結、認同家治个源頭，會變成冷漠虛無个浪蕩客。

(2012-09-22 facebook)