「切磋」个台語

以前看黃海岱大師个布袋戲，有講著「試合 tshì-ha̍p」，是指比試武藝，後來才知影這是日語漢字詞唸台語音，日文个意思是「競賽、比賽」。

閣卡早進前，有儂招我去扑phi̋n-phóng (乒乓)〔切磋〕一下，伊閣問我〔切磋〕台語按怎講？

「切磋 tshiat-tsho」是文言文，出典對論語，現代華語是透過體制教育，才予一般儂接受做是生活用語。咱台語失教育，我若唸 tshiat-tsho，毋知有幾个台語儂接受？

台語口語就講「來削[siah]--一下」，嘛有講「來kah--一下」；無，就用這日語詞「來試合--一下」。

（即个 kah，語源可能是「較[kàu]」、「校[kàu]」。）

放棄吸收文言文，台語文到底有出路無？即點我無佇遮議論，總是，有真濟主張勿吸收文言文个台文友志，本身煞用真濟書面語，遐个書面語，窮實[khîng-si̍t]嘛是華語詞抑是文言詞。