本文
「危險」正音 guî-hiám；通行真久个俗音是 huî-hiám；不應該个錯音是 uî-hiám。
「危險」古早音是 guî-hiám，「危」字查傳統个台語字典只有 guî 一音。教阮漢文，清朝尾出世个莊世光先生一向都是唸 guî。
但是當今老輩儂普遍講做 huî-hiám，原因可能是前字 guî 受著後字 hiám 个聲母 h 个同化，致使 guî 變 huî，兩字變做仝聲母个字：huî-hiám，這是台語內部个演變，會用得接受。
若是 uî-hiám 个唸法，是受華語音 ㄨ乀ˊ 無聲母个影響，才唸做無聲母个 uî，即種予華語音帶衰个變化會破壞台語个音韻系統，真危險，無可取。
台語詞後字聲母影響前字聲母个例，像「龍眼 lîng-gíng」真濟儂講 gîng-gíng；前字聲母影響後字聲母个例，像「煩惱 huân-ló」真濟儂講 huân-hó。
「危」字本來个聲母 g- 變做 h-，閣一點可能个影響因素就是聲母个弱化，g- 較無好唸，容易弱化做 h-，像「魚」个文言音較存古，唸做 gî/gû/gîr（漳、廈、泉），但是白話音就弱化做 hî/hû/hîr。「岸」文言音 gān，白話音 huānn；「額」文言音 gi̍k，白話音 hia̍h（頭殼額）。
若是按呢，咱咁袂使得將 huî 歸類做「危」字个白話音，像「魚 hî、岸 huānn、額 hia̍h」个例？在我看，「危險」毋是足白話个詞，設使「危」存在白話音 huî，應該會使得單獨用，抑是出現佇其他白話个多字詞才著，袂講干焦出現佇「危險」即个詞，而且危險即个詞，佇舊文獻看會著个標音攏是 guî-hiám。台日大辭典「危 guî」字例句有：「病真危」(pīnn tsin guî) 也是唸 guî，毋是 huî。所以這毋是純粹用文白音韻个對應關係就解說會過个。若欲將 huî 當做是「危」个白話音，也只通定位做是「現代新白話音」，毋是自古所傳个白話音，除非有揣著其他个證據。
無論按怎，其他有「危」字个漢文常用詞，咱台語欲唸，攏應該唸 guî 一音，像「危害 guî-hāi、危急 guî-kip、危機 guî-ki、危機一髮 guî-ki it-huat、危難 guî-lān、安危 an-guî、臨危不亂 lîm guî put luān」……。
補充：印尼个福建儂朋友來交流，講印尼峇眼个同安話，「危險」嘛講做 huî-hiám。
面冊網誌留言
洪龍人
有字當寫Ａ臺語文
凡勢 無的確 斟酌 一目睨仔 監囚 寜可 扌 牙 枷
爪牙（抓扒仔）顛倒（天討） 搖擺（嫐擺）
王崇憲
感謝潘先仔！
Liz Lim
想當初時，這个音予兩个人冤家，毋過我已經袂記得佗一个人堅持佗一項（會記得啥人佮啥人冤，袂記得佗一个堅持佗一項），橫直，尾仔的結果是這馬看著的按呢XD
Liz Lim
一个人堅持g-做主音；一个人堅持現時罕得有人唸g-，愛共h-做主音。
潘科元
目前教台典：「guî-hiám 又唸作huî-hiám 俗唸作uî-hiám」，第三音根本無應該收，若欲收，「我」字嘛著收「俗唸作 uá」。
Liz Lim
我已經袂記得尾仔按怎決定uî欲入去做俗音，總是有理由，是我袂記得矣。
潘科元
Liz, 即款討論，咁無會議記錄記載主要个論點？
Liz Lim
無可能所有的問題攏佇會議討論，這條敢有上會議我袂記得矣，應該有，毋過，彼時我拄入去，是2004彼个階段的代誌，猶是細漢的，無處理紀錄，所以無啥印象，干焦會記得冤家的兩人會共我投這件代誌。毋過早期會議紀錄應該攏是記結果爾爾，我處理的時陣，才有另外共決議的理由記落來。
潘科元
開放政府！即種資料攏應該記錄而且公開，以昭公信。
Liz Lim
若是會議紀錄，印象中攏會當公開，只是干焦記結果，無討論的過程，所以嘛無啥路用
Liz Lim
補充一下，拄才查，疑母字佇台語讀h-的例幾若个，無算例外。若零聲母，可能是根據調查，就詞彙擴散的觀點來看，嘛無一定講，按呢「我」嘛愛收uá。毋過這著愛建立佇調查無問題的前題下。
潘科元
「疑母字佇台語讀h-的例幾若个，無算例外」代誌無遐簡單。疑母字讀 h 攏是白話音，但是疑母个「危」唸 huî 是毋是會使照樣歸入古早傳落來个白話音層，真有問題，我即篇後壁有補寫一大段討論。留言下底也有 Andy Dật 提供音韻條件个說明。
蕭平治
危急gûi-kip，無講hûi-kip；臨危不亂lîm-gûi-put-luān，無講lîm-hûi-put-luān。
施炎郎
正解
可能是走空襲時
才變成’飛險’….
潘科元
哈哈，原來如貓^^
Andy Chen
魚，燃，額，耳，箬，蟻等字 有一個共性，就是鼻音後是-i-類音。 -i-類音氣流能擾亂鼻腔開合，所以【危】字無可能gûi > hûi, 潘先ê想法無賺
岸字 古早ê介音毋是-u-, 是-ï-, 屬佇-i-類音，ce我thang證明
台灣ê客話我無熟。福建ê客話ma7仝款有 ngi > hi, ni > hi ê現象。比如 義字，二字，攏讀hi….而且ma7限佇-i-類音
潘科元
Andy, 多謝汝提供即个觀點
Comments powered by Disqus.