看著一个學生寫講：『
閩南語講了十九年，朗讀也從國小就開始學，
從來我都不覺得我的臺語會比同齡的人還差，
只是今天練習我差點快崩潰了，真的很無助。
我的口音就是很奇怪啊!一下講inn一下講enn，
漳泉口音我總是分不清楚，因為中南部不同。
比賽曾經被點出這缺點，當時我不懂錯在哪，
現在知道了卻很難改，為何一定要口音一致?』
以下是我寫予伊參考的話（這篇台文攏用教育部推薦用字）：
Dear 〇〇：
我知影你真用心，對家己要求真懸，所以壓力特別大，向望我以下開破的一寡原理，會當幫助你練習較順利。
原則上，既然比賽是為著爭取冠軍，當然各方面愛做予完美，假使有另外一位優秀的參賽者，伊每一个評分項目攏佮你平好，但是伊腔囗比你較一致，評審最後一定會予伊第一。這佮實際上，台灣逐所在攏是漳泉濫，是兩回事（「濫」的情形、程度各地無仝），因為比賽這種代誌，本質上就是無啥自然的，為著分出名次，評審只好去計較一寡佇自然的情境，無應該計較的小所在。
阮蹛屏東，自細漢嘛是漳泉濫[Tsiang-Tsuân-lām]，有的字干焦知影唸 -inn，像「田嬰 tshân-inn」（蜻蜓）；有的字干焦唸 -enn，像「鄭 Tēnn」；有的字兩種音凊彩用，像「生囝」的「生」，有時講 sinn，有時講 senn。從來嘛無注意著有啥問題，佮儂溝通嘛攏無問題。
到我讀到大四，家己研究台語了後，才了解遮的字有漳泉口音的差別，漳腔攏講 -enn（嬰 enn、鄭 Tēnn、生 senn）；泉腔攏講 -inn（嬰 inn、鄭 Tīnn、生 sinn），按呢我出外到一所在，若是泉腔較重，我就攏改講 -inn；若到漳腔較重的所在，我就攏改講 -enn；若轉去故鄉，我猶原濫咧講。閣親像我咧寫羅馬字台語文的時，佇仝一篇內底，就會前後求一致。看是全部用 -enn，抑是全部用 -inn。
按呢做，予我會當佮別所在的人，用台語、台文咧溝通，上蓋順利，怹嘛會對我較親切。
但是愛注意，有的字是無分漳泉，一律攏唸 -inn 韻母，像「天 thinn、邊 pinn、甜 tinn」，這三字絕對無 thenn、penn、tenn 的講法。
若就按呢一字一字落去硬記，你當然會足煩惱，驚仔到時一下緊張，改袂過來，顛倒表現了袂自然。咱來讀台語系，毋是學會曉講台語、寫台文就好，一定會學習著「語言的系統性歸納分析」的本等。
你看頂面的字，漳泉有分 enn / inn 的，華語音韻母攏是 ㄥ；若是漳泉攏唸 -inn 的，華語音韻母攏是 ーㄢ。所以會用得利用這種對應關係來幫助你分別。請你家己繼續加想一寡例。
當然，自細漢培養出來的習慣，力量真大，你愛有相當的時間，才有法度將以上所講的系統智識「內化」，變做自然的反應。親像人生的境界，第一階段是「見山是山」，第二階段是「見山不是山」，第三階段又閣變「見山是山」。但是第三階段佮第一階段已經完全無仝矣啦。
將來，你閣繼續研究漢語聲韻學，就了解，台語這種腔口分化，佮古早的漢語音韻分類，關係非常密切，你這方面的智識愈豐富，就愈有能力輕鬆來控制家己的台語腔口，拄著無仝腔口的人，嘛愈有才調臆出伊的本居地，而且閣解說腔口的分法佮道理予伊聽，予伊信服你的專業。
若無，你來讀台語系，台語無可能比毋捌字的阿公阿婆較𠢕[gâu]講（我嘛是），上加只是會曉寫台文爾爾。咱著愛有以上所講的智識佮能力，咱才有可能超越無讀過冊的老大儂，有能力運用系統性的台語音韻智識，解說予失落母語的人聽，來傳承台語文化，按呢你讀台語系就有價值囉！
因為這馬的人，母語普遍流失，怹若是自細漢攏講台語，無影需要這種智識，但是怹已經大漢，就需要分析性的智識來幫助怹學習，才學會好勢。就親像咱咧學英文，嘛是需要文法仝款。
Comments powered by Disqus.