9/9 佮 9/10 去參加 2006(第三屆) 台灣羅馬字國際學術研討會。我有發表一篇：蔡培火《十項管見》ê 語詞運用對現時台語文 ê 啟示。
離開學術太久喇。寫論文煞親像塊寫 blog 共款，水kong2亂濺 (cuann7)、銃子亂tuann7，無 tau 無 sau，三講四 lau3-kau1，誠害。雖是按呢，寫 blog 是ke1快活無凍算咧--no。
共我評論个儂是 Belgium 个 Dr. Ann Helen。即擺國際研討會，干那我即篇，主辦者安排予外國學者評論，這是我个榮光 (ing5-kng1) 。伊無講啥麼批評，只是問兩三个簡單問題，閣共我鼓勵一下。我傷晏交論文，無予儂有時間寬寬仔看，真失儂禮。總是，伊个儂真無打緊(註)，即兩工佮伊个cih4-ciap4，真感心。
Dr. Helen 佇 Leuven 大學个博士論文是寫台灣日本時代个語文運動（卜做即種題目，愛專工加學足儕種語文：台灣話、白話字、台語漢字、日文、北仔話文、古漢文…），千萬(ching1-ban7)里外一个歐洲女子，會對咱台灣生出按呢个興趣，予儂料袂到；閣再我即陣重出世(ting5-chut4-si3)來做台語，會拄著一个天邊海角來个姿娘儂，用伊本身个行動來鼓舞勸慰(khuan3-ui3)我，從中(ciong5-tiong1)因緣，不可思議。
頂幾日我哪寫哪想講，我寫个雖是毋ciann5論文，無夠語言學个水準－－這一方面是久無餾，一方面是刁工卜去亂，趁機會對台語界諸君告白(ko3-peh8) 我个理想－－總是，卜會凍理解，閣再欣賞內底一寡卡幼細个心思佮巧氣(khiau2-khi3)，所需要个文化、語文背景，毋是咱在地儂，閣長期有心浸佇本土語文个儂，實在真 oh--得。若是正常个社會，是毋免「有心」去浸，順其自然著有夠額。毋閣咱个社會 koh-iunn7，親像目今(bak8-kim)一般台灣儂 gang7-gang7予壓霸勢力个 kun2-lun2-cun7水 拖塊 phah-phong7泅 ，按呢 in 著會講我寫這是火星文。
註：「無打緊 (bo5-tann2-kin2)」佇遮是形容儂真親切，會關顧別儂。即種意思个用法，現時塊卜無凍聽見矣。
Comments powered by Disqus.