參賽者

今仔日一个北部學生，上台分享伊以前參加台語朗讀賽个經驗，伊上台照慣例先講：「各位評判先生，各位朋友，我是第幾號參賽者某某某……」。比賽結束，伊予一位毋知佗位來个評判先生叫去講：「後遍毋通講『參賽者』，汝是咧參尿食，抑是參屎食？」

正常个「參賽者 tsham-sài-tsiá」予即位評判完話講對「參屎食 tsham-sái# tsia̍h」去。台語「者」是第二聲，「食」是第八聲，即个學生，並無將第二聲唸做第八聲，煞予評判按呢教示，真不明。莫非是評判家己分袂清第二聲佮第八聲，「者、食」本調無分？

老實講，阮南部腔有即種現象个儂愈來愈濟，連中老年層也有按呢－－本來是唸高短調个 -h 第八聲，因為束喉促音斷了無斬截[tsám-tse̍h]，音拖了較長去，變高降調，煞佮第二聲个高降調糊混去。

-h8 佇台語真無穩定，各地攏咧變化中，有个變做佮 -h4 仝調（「石 tsio̍h、借 tsioh」、「葉 hio̍h、歇 hioh」本調仝款中短調），若阮南部个大趨勢是變做佮第二聲仝調（「食 tsia̍h、者 tsiá」、「窄 e̍h、矮 é」本調仝款高降調），但是變調猶原攏有分。閣一種是 -h8 變做佮第七聲仝調（「杓 sia̍h、謝 siā」、「屐 kia̍h、崎 kiā」本調仝款中長調），這愈食力，因為本、變調攏無分，完全合流矣。總講一句，-h8 已經變做台語上歹剃頭个聲調啦。

聲明：以上是就事論事，為著提升眾儂个台語智識來討論，毋是針對某一位先生來批評，其實我嘛毋知是佗一位，也袂去探聽。