「塗礱 thôo-lâng」，圖片出處：Facebook 臺灣國定古蹟編纂研究小組。以下个說明是我家己寫个：
第一擺看著規組完整个「塗礱 thôo-lâng」相片。塗礱是挨粟[e-tshik]个家私，用來將粟殼佮米粒分開，設計原理類似「石磨 tsio̍h-bō」。「塗礱」佇台語文獻往往寫做「土壟」，也有儂寫「土礱」。
粟仔對正爿迄个塗礱頂面个「塗礱壺 thôo-lâng-ôo」倒入去，塗礱有鬥兩支橫柴，叫做「塗礱耳」抑是「塗礱手」，凊彩選其中一耳，掛一支「塗礱鈎」起去。一个儂用粟箕[tshik-ki]貯粟，倒入「塗礱壺 thôo-lâng-ôo」內。兩、三个儂徛佇相片倒手爿，手扞[huānn] 塗礱鈎个橫柄（有用白索仔縛吊咧），同齊出力來挨[e] 塗礱。
「挨」就是捒進前、閣搝[giú]倒退，來來回回个動作（所以樂器「絃仔」嘛是用「挨」个），予塗礱个「頂tún」（上半部）轉硩[tńg-se̍h]（頂tún 佮 ē-tún 中心有插一支「塗礱心」），「頂tún」佮「ē-tún」內底个接觸面有做「塗礱齒」互相磨擦，hū-hū叫，將粟殼磨捒，就是粗糠[tshoo-khng]，對塗礱腹肚个四箍輾轉 落[lak]出來（中央箍一輾咧承[sîn]迄沿，我毋知按怎稱呼）。米粒、粗糠，閣有挨無清氣个粟仔（粟殼猶未磨掉），即三項會濫做伙漏落來，用相片中央下跤迄kha「米籮 bí-luâ」收集起來。
一个儂將米籮內遮个物，提去倒入「風鼓 hong-kóo」个「風鼓斗 hong-kóo-táu」，手絞「風鼓手 hong-kóo-tshiú」鼓鼓咧。粗糠較輕，飛去「風鼓」頭前个「粗糠間」，米佮粟對風鼓下跤漏落來。了後，米粟倒起去「米篩 bí-thai」頂，捧起來篩[thai]（搖動），予米漏落去，粟留佇米篩頂，因為篩一遍袂清氣，所以愛篩兩三擺。遐个粟才閣提轉去塗礱間，閣重挨。閣用風鼓 鼓，米篩 篩，來來回回幾若遍。
以上是用塗礱來「挨粟 e-tshik」，按呢挨好个，只是糙米，也就是干焦磨捒「粗糠」。若欲愛較白个米，著閣用「舂臼 tsing-khū」來「舂米 tsing-bí」，將「米糠 bí-khng」也舂捒。
專門挨塗礱个所在，叫做「塗礱間 thôo-lâng-king」，照頂段所說，咱會凍設想，挨塗礱个過程中，粗糠一定會 phōng-phōng-颺[ing]，俗語講：「驚颺 欲落塗礱間」[kiann ing beh lo̍h thôo-lâng-king]（句中押韻），「落」是動詞，指「入去（留佇遐）」，即句俗語个字面意思是，一方面閣驚颺，一方面閣欲入去塗礱間挨粟趁錢。比喻欲愛一項物件，閣無愛付出代價、驚負擔後果个矛盾心理。嘛有講「驚颺 毋通入塗礱間，驚死 毋通當兵[tng-ping]」。
俗語「塗礱無換耳」[thôo-lâng bô uānn hīnn]，若有兩支耳，閣會使輪流用，若干焦一耳，無法度換別耳來鬥塗礱鈎，比喻厝內只有孤一个囝咧勞動，無別儂替手。
俗語「破草鞋 楔[seh]塗礱跤」，相片中看會著迄四支跤，若無tshāi佇仝一个平面（幾何學所講个平面），會 lo̍k-lo̍k hián，就足歹挨[e]。提袂穿得个破草鞋來楔塗礱跤予伊 絚癉[ân-tan]、在穩，就是廢物利用个意思。
阮是屏東萬丹鄉水泉村个儂，阮阿公少年時代有用舂臼，可惜我無聽過伊提起塗礱，阮爸爸就毋知塗礱即種物。佇 1926 年出版个台語白話字小說 Chhut Sí-sòaⁿ（出死線），內底男主角个老母至勤倌有去攑舂槌[tsing-thuî]舂米趁錢，也無講著塗礱。
以上說明，懇請各位先進指正、補充，感恩。
2014-01-05 修訂註跤：
後來我讀著 中堂謙吉《台語類編》(1903) ，發現我佇 2013-11-05 所寫，有寡錯誤佮不足，所以重修訂過。
Comments powered by Disqus.