台中个冊店

台灣予我感覺卡親像个冊店，台北上儕間。其他个大都市攏只有一兩間仔。台中个，我上愛去中友誠品，內底tshiânn-kik了真蘇氣（毋閣光線著有卡暗），閣卡重要个，是冊个種類袂少，嘛有真儕人文方面个英文冊，毋是干那有迄種卜予儂學英文个英文冊。

誠品真爻排冊，平平迄本冊，佇別間冊店就卡袂引起我个注意，佇誠品，著愛特別siânn儂愛買。普通冊店攏囥一寡卡通俗个冊、雜誌，對我來講，卡無聊。有一半本仔卡有意思个冊tshap佇內底，嘛袂hiánn目。

台中另外兩間誠品著卡細間，裝潢嘛卡無hiah巧路[khiáu-lōo]。中友誠品有三棧，儼然[giám-jiân]是按照通俗性去分，愈頂峘棧个愈無通俗，嘛愈儕英文冊。第三棧是圓形个樓閣，柴地板，se̍h一大liàn。樓梯頭有一个半圓形个位thang好坐，坐會著个機會真大。

書林台中分店，我去過一遍，踮無外久 儂就卜歇睏，所以無蓋清楚，想講遐个英文字典應該袂少，煞無啥有。其他个英文冊可能有一寡，另工tsiah閣去看昧。總是，佇六樓个店面無大。

科博館[kho-phok-kuán]附近个敦煌，有真儕學英文个英文冊佮小說，一般个英文冊毋知儕或少？

有袂少英文電腦冊，佇逢甲商圈[siong-khuân]个揚業書局，已經收起來矣。目今台中無別間即款个矣。

講是台灣上老个瑞成書局（1912年創立），主要是塊賣宗教、五術个冊，有一排書架仔个台語冊，khioh袂少竹林書局个歌仔簿，以外無啥麼。

三民路三段有一間「台灣本土文化書局」，一間平階舊厝，專門賣台灣冊，bih-sih-bih-sih，冊囥[khǹg]塊ing-ia。

有幾那間分店个新學友，賣文具佮通俗冊為主，頂日仔崇德路迄間分店，敢是做袂落去，迄間店面予別儂租去塊賣lim个、食个，生理好kah-。