台灣俗語真濟完美押韻个例

較媠氣个台灣俗語，若有押韻，真濟是完美押韻，意思就是：毋但韻母仝款，聲調也仝調。親像：

「好心予雷tsim」、
「揀啊揀，揀著賣龍眼」、
「忍[lún]啊lún，lún著一个金石-tún」、
「翁生某旦，食飽相看」、
「外甥食母舅，親像食豆腐」、
「出門liu-liu-tshiu-tshiu，食兩蕊目睭」、
「直直食，直直賰；直直儉，直直lun」、
「有爸有母 初二三；無爸無母 頭擔擔」、
「看會著，較贏九斗換一石；看袂著，汝个心肝會礙虐」。

這佮七字仔歌詩，抑是聯對个慣例無仝。聯對尾字是前仄後平，七字仔歌詩四句話个尾字是「仄、平、仄、平」為主。

當然俗語也有袂少無完美押韻个情形，像「歹年冬，厚痟儂」、「雙跤踏雙船，心頭亂紛紛」，前後句尾字个韻母仝款，但是聲調無仝，因為話語著先顧意思，才顧聲韻。

補充：

「好心予雷tsim」尾字雖然教典寫「唚」，當今一般儂也認定是 kiss 个意思，唸鬥句聽起來真古錐，但是這無影正確，tsim 佇台語口語動詞，毋是只有 kiss 个意思，閣有用摃槌、石頭、鈍器大力hám个意思，刣牛个時用來摃死牛个器具叫做「牛-tsim」，台日典寫「牛箴」，另外伊有例句「用石頭共伊tsim--死」。

我相信「好心予雷tsim」也是即種用法，毋是 kiss，現代儂台語退化，毋知影 tsim 閣有別種仝音動詞，才干焦會想做 kiss。

即个主張，研究台語漢字个老前輩劉建仁先生有詳細个稽考：好心給雷親（ho`-sim hɔ⊦-luiˊ tsim）──好心没好報

「忍[lún]啊lún，lún著一个金石-tún」个典故：

這是出名个民間故事，簡單講，一个員外發心做好代，有求必應。伊嫁查某囝迄日，來一个乞食，要求佮怹查某囝先睏一暝，員外難忍能忍，iáu是答應伊，隔工乞食無--去，留落一个金石-tún。