台灣民間个褒歌藝術是寶貴个台語文化

有友志咧問講，台語到底有啥奇巧个好文化，予國民黨消滅去？

以前有真濟台灣鄉親老大儂，雖然無讀過冊，但是出喙有字、四句成詩，鬥句押韻、心適好聽个台語祝福話講袂盡，閣會相褒對唱，觸景即興[tshiok-kíng tsik-hìng]，汝一葩，我一葩，現想現唱、應答無停，通講較贏才高八斗个曹子建。

請問戰後出世，當今六十幾歲以下，咱台灣中少年儂，有幾个會曉這？囡仔予國民黨關佇學校講北京話，轉來厝裡，繼續讀寫北京話文功課，連學習台語日常對話个機會都無，欲按怎學會著即種超高段个台語？這就是國民黨消滅台灣語言文化个鐵證之一。

比較遐个明星上電視錄影，講出來个北京華語賀新年，閣迄个急智歌王，先佇後台偷準備好才唱出來个，意境佮內涵根本是真珠比老鼠屎。

北京歷史人文極深厚，怹在地儂个語言藝術也非常高明，但是國民黨硬壓迫咱邯鄲學步，外來个 猶未學一个皮毛，祖公个 就已經予伊破壞了了。

有幾位台語文界个志工，長期投入，搶咧記錄 強欲失傳个民間台語相褒藝術，二十年來，所揣會著个老大儂，會曉即時想詞對唱个，已經足少，較濟是會記得以前有唱過个歌詞（部份是頂輩留落來，部份是自編）。各位若有興趣，會用得佮林金城先生交陪，抑是追蹤伊个FB，伊最近有一直咧整理、分享怹幾位友志，辛辛苦苦才採集著个田野錄音整理佮台語文字幕、解說。

接受採訪个老儂，攏是素人老百姓，已經年老梢聲，怹多數毋捌字，也根本無學過音樂，所以請毋通用專業樂師个標準來對待怹。才會凍欣賞怹牽聲拔調[khan-siann pue̍h-tiāu] 唱出上媠个台語百姓話，將田庄生活佮男女情感自在流露个民謠藝術。