台灣諺語「井水化做酒，尚嫌豬無糟」

今仔日欲講个高階諺語：「井水化做酒，尚嫌豬無糟」[tsínn-tsuí huà tsò tsiú, siōng hiâm ti bô tsau]。

即句諺語个出典是漢人自古流傳各地个故事，其中一个版本，講有仙人打扮做乞食，不時去共一間酒店分[pun]酒 食，頭家真慷慨，攏請--伊。後來仙人感心，行去酒店个古井邊，手一比，將井水化做酒，就按呢無看見儂。

幾年仔後，仙人閣來，問頭家過了按怎，頭家就講，日子加足快活，毋過，本來激酒[kik-tsiú]了後有酒糟通好飼豬，今[tann]無囉。仙人聽了幌頭[hàinn-thâu]，指頭仔閣比一下，將鼓井內个芳酒閣變倒轉白汫水[pe̍h-tsiánn tsuí]。

面對日日換新个 3C 產品，咱个心嘛是按呢。

相關个諺語：

「也欲甜、也欲滇[tīnn]、也欲大碗、也欲滿墘[buán-kînn]」。

「人心不足，蛇吞象」[jîn-sim put tsiok, tsuâ thun tshiūnn]。

昔時賢文「天高未是高，人心節節高」[thian ko bī sī ko, jîn-sim tsiat-tsiat ko]。

(Facebook 2012-10-17)

有先進來賜教，講：是按怎欲用「尚」。伊可能感覺無自然，無夠口語化。我查過台日大辭典佮台灣俚諺集覽，兩本冊攏有收即條諺語，攏寫「尚」注 siōng 个音，表示這可能是一種對書面吸收來个諺語，毋是閩台原生个口語俗語。我一開始有講，出典是漢人自古流傳各地个故事，故事个來源無一定是佇閩、台。

毋過，閩台語其實嘛有講「尚且 siōng-tshiánn」。