台語三疊音詞第一音節就是第六聲？

台語三疊音詞第一音節根本袂使叫做第六聲。

有先進憢疑台語加強形容个三疊音詞，像「燒燒燒、紅紅紅、大大大」个頭字个聲調，無應該叫做第九調，應該是第六調本調。絕對毋是按呢。

台語一般腔，陽上[iông-sióng]第六調个字，毋是唸第二聲陰上，就是唸第七聲陽去，只有老派鹿港腔（為主）才有獨立个第六調。

第九調是特別情形之下產生个特殊調，毋是個別个漢字个台語本調在內，古早个文獻無提起，因為學術會代代進步，像古早个漢文先，只有漢字本調呼八音个觀念，變調个理論怹完全毋知，只是照直覺咧變，怹嘛毋捌講啥乜「一七三二一、五嘛變七」即種變調个口訣。

後來有傳教士佮現代語言學者，尤其是日本學者來，才提出變調个觀念。但是自早个台語就有變調个現象，毋是怹提出變調个理論，台語儂咧講話才開始會變調。

變調个理論精益求精，戰後个學者才閣提出各種無仝型態个變調。後來閣提出一寡合音詞，像 e-hng => i̋ng，佮「閒 îng」無仝調；抑是外來語，像 e̋n-jín 个 e̋n 佮「鉛 iân」無仝調，即種中升調个調值是台語八音本調，抑是正常變調所毋捌出現个調值，姑不將，才共伊號做「第九調」，這只是一種名稱而已。親像「輕聲、固定低調輕聲、隨前變調輕聲」遮个名稱，古早漢文先根本毋捌想著，但是實際个語音現象早就存在。

台語第一聲、第五聲、第七聲个三疊音詞變調个頭字，有儂是變做中升調，所以共伊叫做第九調。但是這是無一定个，像阮是慣勢講做「中升再降調」，就無適合標做第九調。 （本文原來發表佇 Facebook 2015-11-01）