關係台語个「阮」佮「咱」，佇友志个所在留話，轉來家治遮，盡量佇時間內寫予卡詳細咧……
第一層个基本意義：
阮，第一人稱複數，無包含聽話个對方。比在對同學是講，「阮兜卡無錢。」
咱，第一人稱複數，有包含聽話个對方。比在對兄弟是講，「咱兜卡無錢。」
台語有兩種第一人稱複數，台灣華語無即種分別，所以即馬个台灣囡仔受台灣華語影響，台語个「阮」佮「咱」，怹定定分袂好勢。
第二層个意義：
阮， 第一人稱單數，取代「我」，表示客氣、故謙，袂輸是咧講，這是阮一陣儂个共識，毋是我一儂咧講sai-khia，雖然事實只是家治一儂所想。相對來講，講 「我」卡囂俳。這著是單一作者个英文論文內底所用个we，袂輸是講，「我有佮別个學者私下討論過喇，伊對我个主張嘛有同感，所以我寫"we"嘛無過份 啦。」
咱，第二人稱單數或者是複數，可比講老師私下苦勸單獨一个學生；或者是款勸全班。明明是指對方，是按怎講話者欲 用將家治嘛包含入來个「咱」？亦著是轉化第一層个意義，變做第二層？即種講法卡婉轉，講話者用來表示佮聽話者是共國个，予對方聽卡會入耳。可比監考个先生 對考生講：「咱咧考試个時，毋通偷看別儂个」。英文無分阮佮咱，所以伊佇遮嘛是講 we。可比講 We should be honest.
以上因為第二層个用法，有誠明確个語用場合，所以袂啥會佮第一層糊混去。著準有時袂凍明確知影「阮」是指單數抑複數，因為無影響溝通，所以無要緊。
「咱」做第二人稱，代替「汝/恁」个用法，有一个重點愛補充－－這毋但是用佇款勸對方，便若社會上佮儂tsih-tsiap，不時愛用--著。華語第二人稱普通講法是「你」，尊稱是「您」。若台語个用法，普通講法是「汝」[lí / lír / lú]，客氣个講法著是「咱」[lán]。
可比講，我接著電話，對方講欲揣阮同事抑是親儂，我著愛好禮問伊講：「咱佗位欲揣？」毋通講：「汝是啥儂？」，按呢著傷土[siunn thóo]。官員去地方巡視，著問講：「咱遮今年收成按怎？」毋通講「恁遮今年收成按怎？」。佇外地拜訪儂，問講：「咱遮有出產啥乜？」。欲問儂姓啥，講「咱貴姓？」，雖然問講「汝貴姓？」亦可以，總是，講「咱」个口氣比「汝/恁」加真nng-lio̍h、有禮貌。
台語即種客氣个第二人稱「咱」，是對外儂卡有咧用，對親儂無按呢講，若對親儂講「咱」，是第一層个基本意思，亦著是包括講話者佮聽話者个第一人稱複數；或者是款勸對方、望伊接納个第二人稱代名詞。即點佮華語个「您」無共款，華語「您」對親儂定定咧用。若是對親儂長輩，一直講「汝…汝…」感覺無夠尊重，會凍用稱呼，親像「阿公食有飽無？」，抑是「阿公汝食有飽無？」，即陣毋是講「咱食有飽無？」
若是凱--哥所主張个用法：
"Goán" khah bô khan kám-chêng ê ì-bī, "Lán" ū leh khan, koh kám-kak khah kò͘-khiam, goán tio̍h bô án-ni;
jî-chhiáⁿ "lán" ū sî mā piáu-ta̍t "lín" ê ì-sù.
照伊按呢，「咱」閣會凍表達第一人稱單數，取代「我」，用來佮取代「我」个「阮」做閣卡幼路个分別。即種用法，致到 lán 需要佇無共場合，負擔三種意味：
1. you and me (we) 汝/恁 佮我
2. you 汝/恁
3. me 我
這實在有卡食力，卡歹分辨(disambiguate)。所以我看凱--哥寫講：Lán án-tsuánn án-tsuánn... 有時會分袂清－－伊是欲表達伊感覺讀者佮伊攏會有个共同感受(you and me)， 抑是只是伊作者個人个特殊感受(me)？
「阮」、「咱」除了做主格、受格，嘛通做所有格。但是伊所有格个用法限制卡大，袂凍像英語个 my/our 遐自由。阮兜/咱兜、阮公司/咱公司、阮翁/咱囝，攏會用得講，但是袂使講「彼是阮錢」、「咁是咱車？」， 即種物件頭前个所有格，愛插一个 "ê" 佇中央，「彼是阮 ê 錢」、「咁是咱 ê 車？」。
關係呼音。「阮」漳腔guán、泉腔gún。因為台語流行歌个影響，愈來愈濟漳腔个儂嘛有講gún。是按怎台語流行歌卡愛唱 gún，因為台語流行歌是台北市內个唱片公司發展出來个，迄陣揣个歌手嘛是就近揣著个泉腔儂。因為腔口混雜去，煞有儂感覺 gún 是歌謠用語，嘛有儂相信 gún 卡 sai-nai-khuì（因為流行歌攏情歌嘛），其實 guán 佮 gún 原底全然只是漳泉腔口差。
「阮無愛啦」，是比「我無愛啦」卡軟、卡nai無毋著，總是，gún 無影著比 guán 卡 nai。閣進一步來講，「儂無愛啦」又閣比「阮無愛啦」，iá閣卡nai。「儂無愛」有兩種意思：「我無愛」个sai-nai版，佮「儂伊無愛」。若傳統个查埔儂，因為要求愛有男子氣概，所以怹咧講「儂無愛」攏是「儂伊無愛」个用法。
「儂無爽快」－－「儂」若變調，是親像華語【人家（心裡）不舒服】，亦thang指家治，亦thang講別儂。若「儂」講本調个「儂#無爽快」，是指身體無拄好，毋是khi-móo-tsih个問題。
即馬嘛有儂講「讀書tha̍k-tsu」比「讀冊tha̍k-tsheh」卡文雅，這嘛是泉腔、漳腔个差別，無必要認定佗一種卡文雅。
「咱」一四界攏通講 lán，有寡所在嘛會凍省掉聲母，講 án（看情形唸本調抑是變調）。有个儂，是干焦用佇所有格才有講 án，可比講 án-tia-á / án-tau；主格受格講lán。有寡所在，是連主格受格嘛會用得講 án，阮遐著是按呢，我出來外口，著罕得講 án。
會記得細漢个時，國民黨禁台語，學校扑派一寡高年級个學生做「糾察隊」，隨時咧張持儂有講「方言」無。阮猴囡仔，真愛刁工走去「糾察隊」个面前，大聲講 "Án33 lâi22 pàng31-sái31"，伊若欲掠阮講台語，阮著應講，【我是說『安！來棒賽』啦】
lán 省音做 án，是台語內部个變化，只是個別語詞个方便講法，無礙--著。若是 gún 講做 ún 个台灣國語兒童，往往是歸堆 g- 聲母个字攏 lak-lak 去，彼著真了然。
Comments powered by Disqus.