台語用第二人稱複數「恁 lín」當做第二人稱單數「汝 lí/lír」來用个時，比較起來，口氣較袂遐硬，會較溫和。
舉例像按呢：有危險性个事故現場有一个聽話者（過路儂），講話者（工作人員）對伊講：「『汝』毋通過來őo！」。但是若換喙講：「『恁』毋通過來őo！」，按呢聲說[siann-sueh]就較軟--淡薄。
其中个道理，是因為講單數个「汝」，就是完全針對聽話者一个儂，對聽話者个壓力就較大，因為伊一个儂愛承擔伊一切行動後果个責任。但是若換講複數个「恁」，雖然現場明明只有一个聽話者，煞袂輸講話者是咧對一陣儂講話，予迄个聽話者佇不知不覺當中，感覺毋是針對伊一儂，按呢責任就分散去矣。所以即款話語修辭就有較溫和个效果。
台語閣另外一種修辭法，是用複數个「咱 lán」代替單數个「汝」，這毋但聽起來真溫和，而且閣足親切。親像外儂敲電話來，直接講欲揣某乜儂（拄好毋是接電話个儂），咱就問伊：
「咱佗位欲揣？ Lán tó-uī beh tshuē？」
意思欲叫來電者先報身份，問了知影，咱去叫某乜儂來接電話个時，方便予伊先有心理準備，看欲按怎面對、回應即通電話。
其實即个「咱」毋是台語平時咧用个「咱」，平時講「咱」是第一人稱複數，而且是包含講話者佮聽話者攏算在內（叫做「包含式第一人稱複數」）；若是講「阮 gún/guán」，是無包含、也就是排除聽話者在內个第一人稱複數（叫做「排除式第一人稱複數」）。
所以若講「緊轉來去『咱』兜！」就表示講話者佮聽話者是仝一家伙仔儂；但是若講「緊轉來去『阮』兜！」就表示講話者佮聽話者無仝口灶。這是上基本个生活台語用法，可惜即馬个囡仔，因為予台灣華語帶衰著，多數攏分袂清楚台語即種基本用法矣。
但是頭前个電話對話：「咱佗位欲揣？」是比即種基本用法閣較進階个社交台語。「咱」佇遮是借用包含式第一人稱複數來代替第二人稱（可能是單數，抑是複數），來表現一種徛佇對方立場設想个認同感，予對方感覺伊毋是外儂，有受著親切个款待。
就準咱一个儂去到外地，仝款會使按呢來活用，可比講我上北部某一个小庄頭田野調查，問在地儂：
「阿伯--á，借問咧，咱即庄古早叫做啥地名？」
阿伯--á 一看就知影我是外地儂，佮伊絕對無仝庄，但是伊袂因為我用「咱即庄」就嫌我講毋著話，伊知影這是社交用語，按呢講較有親切感啦。
台語代名詞个鋩角閣有真濟，以前我也捌寫過幾若篇。
Comments powered by Disqus.