前提：羅馬拼音對台灣母語（原住民話、台語、客話）个記錄、書寫、溝通，幾百年來貢獻重大，無較輸漢字，甚至有所超越，咱應該珍惜羅馬拼音，繼續來研究發展、學習應用。（註）
但是欲主張台語、客語个教學、傳承，著愛完全廢除漢字，是死路一條。
若正實有才調，咱著去選總統、立委，修憲立法，將台灣華語漢文連帶全部廢掉，所有台灣儂个漢字名姓攏改拼音字，滿街个招牌攏改拼音字，所有个中文冊攏改拼音字……。
若事實做袂到，就無應該主張台語教學著愛廢漢字。因為台灣華語漢文猶原佇咧囂徘[hiau-pai]，台語傳承廢漢字个下場，就是將漢字个發音權、使用權奉送予北京華語，咱个囡仔佇台灣一四界看著任何漢字（儂名、招牌、路牌、菜單、報章書冊……）干焦會曉唸華語，袂曉唸台語，台語个使用機會就愈來愈少，怹也感覺台語足歹用、無路用，自然就棄捒台語。
無論咱台語文界是無權無勢、抑是有權有勢，攏仝款無可能廢漢字，連專制極權个共產黨嘛做袂到。
越文、韓文，攏是怹个國語文，這就是怹做會到脫漢个原因。咱若會凍將華語漢文趕走，咱欲脫漢才有可能成功。脫漢个前提，是先廢華語漢文，毋是先自廢武功，佇台語教學放棄學習漢字。
爭取台語个使用機會，才是咱現此時上重要、也是做會到个任務。自細漢照起工來教學台語文，無論是羅馬字，抑是基本數量个漢字，攏是一般儂學有路來个語文訓練。
脫漢，是為著提回咱文化个主述權，這真重要。但是漢字个使用權也是真重要，無權利、無能力使用漢字个台語儂，連台語也會予儂哺食去。
漢字應該繼續檢討整理、簡化減量，但是佇台語个傳承中，無可能、也無應該全廢。踏孤爿佇台語教學廢漢字，卻無才調廢除華語漢字，毋但是駝鳥心態，也是自斷跤手、自廢武功个戇步。
我个重點是：肯定漢字佇台語傳承也真重要。佇無法度廢漢字个現實處境，只有加學一寡漢字个台語音，才有較濟機會應用台語來生活，楦闊[hùn-khuah]台語个活路。
註：小弟有佇 Facebook 開設社團「台語白話字文獻讀冊會」，是利用 Google+ Hangouts 个視訊聚會功能，招集各地會曉讀台語羅馬字文獻个友志，逐禮拜相佮研究學習。
Comments powered by Disqus.