入聲變調舊口訣「四八互變」有問題
「台語 -p/-t/-k 韻尾个第四聲佮第八聲，變調了後互變，四變八，八變四」，即種教學法，通行真久。我歹勢講伊毋著，總是，我袂按呢教。
實驗：第八聲+第四聲个兩字詞變調
直接：ti̍t-tsiap
特色：ti̍k-sik
特約：ti̍k-iok
特質：ti̍k-tsit
物質：bu̍t-tsit
業績：gia̍p-tsik
墨汁：ba̍k-tsiap
墨色：ba̍k-sik
目色：ba̍k-sik
目角：ba̍k-kak
綠竹：li̍k-tik
綠色：li̍k-sik
熟漆：si̍k-tshat
熟識：sio̍k-sik
佛法：hu̍t-huat
律法：lu̍t-huat
毒殺：to̍k-sat
咱台語鄉親無一定有咧講以上每一條詞，總是，其中上無嘛有五、六个詞咱本底就會曉講，就遮个詞來判斷也夠額矣。判斷看第八聲變調了後是毋是佮第四聲平懸？就是所謂「八變四」个「規則」。
遮个詞後字攏是第四聲，唸本調；前字攏是第八聲，愛變調，變調了後，若正實佮第四聲本調平懸，按呢咁毋是講，前後兩字个實調攏平懸矣？咁有影？
咱若有一點點仔起碼个音感，就分辨會出來，前字變調了後个聲調明明比後字較低，至少有音樂上一个全音个差別。
咱若真正乖乖仔照「八變四」个音去唸遮个詞个第一字，閣配第二字起來，兩个字真正平懸去唸出即个詞，聽起來會足礙虐，袂輸咧聽機器儂講台語咧。
就準咱音感無好，分袂出來，咱會使寬寬仔去感受，遮个詞，呼第一字个時，聲帶會較激力，因為愛將聲調壓落低，但是唸到第二字个時，就較輕可，因為毋免閣唸遐低調矣。
閣一个撇步，咱唸遮个詞个時，會使得用手指頭仔去摸嚨喉，感受前後兩字聲帶震動个頻率無仝。
第二字第四聲本調是中短調，中調是咱正常台語儂上好唸个聲調，聲帶免激力。這就像唱歌仝款，中音域个音逐家好唱，懸音有儂就唱袂起去，低音嘛是唱較袂落去。唱懸音、低音攏著較激力才唱會。
以上个說明干焦指出「八變四」理論無符合聲調懸低音个物理事實，總是，無真正解說出「八變四」即套通行百幾冬个台語教學法背後个理路。畢竟即套教法也成功教出濟濟台語儂予怹會曉羅馬字，有伊存在个因端佮價值。總是，即篇已經寫傷長矣，後擺才閣寫。
台語入聲變調我个教法：四變懸、八變低
我會教講：-p/-t/-k 韻尾个第四聲變調變懸音，第八聲變調變低音，口訣「四變懸、八變低」。 即種教法毋但會使避免頂面所講个困擾，閣會使涵蓋台語各種腔口，無論汝个第八聲本調是高短調、 中調（中長抑是中短）、抑是升調，「四變懸、八變低」攏是保險、妥當个講法。
（華語儂欲學台語中調，包括第七聲中平調、第四聲中短調，就無影遐輕可，因為華語主調類四聲本調內底並無中調，毋是懸就是低，華語輕聲才有類似台語个中調音。我教學生呼台語八音，怹唸到第七聲个時，往往會唸做第一聲个高平調，這毋是因為怹个發音器官本身唸台語第七聲較食力，只是一時袂慣勢爾爾）。
2023-05-31 補充：整理舊作，發現2015年就捌佇面冊寫過即个「新口訣」。 經過遮濟年，外口咧教台語，絕大多數猶原是教「四、八互變」。只要迄種教法猶是主流， 按呢我即个口訣就有資格叫做「新口訣」。當時所寫，後來我有轉貼來理想國網誌： 演講補充：台語變調新口訣：四變懸、八變低
Comments powered by Disqus.