有一句賣藥仔个台語廣告詞，各位一定捌聽過：「先消炎，後止疼」。即句話个變調真值得深思哦。咱先想看覓……
伊是講做 Sing siau-iām, āu# tsí-thiànn. 也就是「先」字唸變調，「後」字唸本調。照表面看起來，「先消炎」佮「後止疼」是一模一樣个語法結構：「副詞 + 動詞+名詞受詞」，「動詞+名詞」迄部份閣形成複合動詞，做動詞詞組（verb phrase, VP）用。
按呢是按怎前後兩句有無仝款个變調方式咧？
其實即句話著愛按呢斷句：「先消炎；後，止疼」，咱著將這看是兩句話並列，前一句是「先消炎」，後一句是「後，止疼」。
前一句迄个副詞「先」是直接修飾動詞詞組「消炎」，佮「消炎」个關係較密切，即種動詞叫做「動詞詞組个副詞」(VP adverb)，即種副詞通常唸變調。
但是後一句迄个副詞「後」雖然表面上佮「止疼」接做伙，但是伊个語法地位並毋是直接修飾動詞詞組「止疼」，伊个語法地位較懸一階，是佇後一句个上頭前，當做「規句个副詞」(sentential adverb) 用，即種副詞个尾字（佇遮只有一字「後」，就是尾字个地位）往往唸本調（輕聲个特殊情形掠外）。
按呢講，僫體會，咱試將「先」用「代先」來替換；將「後」用「了後」來替換，而且將伊含藏个意思較完整來寫出無仝語序个句讀[tāu]，就會發現趣味个現象，有个講法會通，有个講法袂通：
1.（會通）代先#伊會消炎。（「代先」囥佇上頭前，「先」本調）
2.（會通）伊代先#會消炎。（「代先」徙去「伊」後壁，「先」本調）
3.（會通）伊會代先消炎。（「代先」進一步徙去「會」後壁，「先」變調）
4.（會通）了後#伊會止疼。（「了後」囥佇上頭前，「後」本調）
5.（會通）伊了後#會止疼。（「了後」徙去「伊」後壁，「後」本調）
6.（袂通）伊會了後(#)止疼。（「了後」進一步徙去「會」後壁，「後」無論唸本調、變調，即句話攏袂通！）
第 1、2 句个「代先」是做規句个副詞用，尾字「先」唸本調，但是第 3 句个「代先」个尾字「先」就唸變調，這是做動詞詞組个副詞用。也就是「代先」有時會使做規句个副詞用，有時會使做動詞詞組个副詞用。
第 4、5 句个「了後」，親像第 1、2 句个「代先」，也是做規句个副詞用，「後」唸本調。但是到第 6 句个時，「了後」就袂使徙去「會」佮「止疼」个中央，因為「了後」無做動詞詞組个副詞咧用，干焦做規句个副詞咧用爾爾。
「先消炎；後，止疼」即句話其實就是「先消炎；了後，止疼」个省略講法，迄个「了後」只做規句个副詞用，「後」字就唸本調。
以上是用句法分析个方式來解說台語變調个行為，句法分析會使得解說、預測真濟台語變調即種語音現象，但是台語變調毋是全然攏會使得用句法分析來解說，代誌無遐簡單，我相信也有一寡先進會感覺講：「先消炎，後止疼」个「後」唸變調嘛會通啊！無錯，但是這就毋是屬佇「句法分析」个層次，是屬佇「韻律分析」个層次對變調行為所產生个影響。
簡單講，恁「後」字若唸變調，毋是袂使，但是按呢就袂得共伊斷句做「先消炎；後，止疼」矣，干焦會使斷做「先消炎；後止疼」爾爾。這欲真正解說蓋複雜，另日才討論。
Comments powered by Disqus.