台語動物名 bâ，教育部台語辭典寫做「猫」；若是 niau，伊就寫做「貓」。其實「猫」、「貓」兩字佇漢字系統內只是異體字。無法度啦，台語太豐富咧，只好將本來仝一字个無仝寫法，提來分用。
「貓 niau」是英文 cat，真簡單。「猫 bâ」單字到底是啥意思？這所指稱个動物毋但一種，以前个文獻顯示，「猫 bâ」會使通稱「niau，抑是像 niau 个動物」，無論是厝內飼个，抑是野生个。
若是厝內飼个，可比古早俗語講「家內無猫，老鼠會蹺跤。」（Ke-lāi bô bâ, niáu-tshí ē khiau-kha.）閣有「好猫管百家」（Hó-bâ kuán pah-ke.）這攏是指厝內niau。即種用法，目前台語已經無時行囉，所以即兩句俗語个 bâ 佇現代台語往往改講做 niau。
若是野生个，彼就較複雜囉，包括華語〔石虎〕、〔果子貍〕攏算是 bâ。〔果子貍〕著加一字「仔」，叫做「猫仔 bâ-á」，也有儂講較明，叫做「果子猫 kué-tsí-bâ」。各種个「山貓 suann-niau」攏算是 bâ，台灣山貓就是〔石虎〕。野生个 bâ，也有儂通稱做「貓猫 niau-bâ、貓猫仔 niau-bâ-á」。
以早个儂講：bâ 會咬人類个紅嬰仔去食。真恐怖哦！囡仔無乖，大儂就共怹hánn講 bâ 欲來矣！
山貓个身長會大甲 100 公分以上，伊會咬嬰仔，毋是無可能。
Bâ 我毋知〔雲豹〕有算在內--無？〔雲豹〕佇新編華台語對照典有收四種台語講法：「羌仔虎 khiunn-á-hóo、烏雲豹 oo-hûn-pà、獐豹 tsiunn-pà、貓豹 niau-pà」。
有一齣真出名个古裝戲「貍貓換太子」，「貍」个異體字是「狸」，毋管按怎寫，咱民間一律唸做 Lî-bâ uānn thài-tsú，是 lî-bâ，毋是 lî-niau。一--來「貍猫」毋是一「種」動物个正式名稱，二--來咱台語儂日常也無用這咧叫佗一種動物，我想 lî-bâ 對台語儂來講，只是戲齣名爾爾。
補充：罵無檢點个查某儂 bâ-á，即種講法，教典另外寫做「媌仔」，伊解說做〔妓女、酒家女。〕。相關个歹聽話閣真濟！真可惜，目前查教典 bâ-á 伊干焦收即種歹聽話「媌仔」，煞無收正正常个動物名「猫仔 bâ-á」（干焦列佇「果子猫」个方音表內，連近義詞欄都無收，按呢無好，著愛單獨列做一詞條才好），這毋是理想个台語教育。我已經建議補收矣，希望明年查會著。
Comments powered by Disqus.