台語動詞「出」佮受詞中間个三種介係關係

各位看英文佮台語講法拄好倒反[píng]，英文是 into（入），台語是「出」，真心適喔！

台語「出」直接 接名詞受詞，中央無閣用介詞，「出」所接个受詞，有時是指 into it，有時是指 out of it，有時是指 through it.

一、into it 个例：出席、出社會、出陣、出台（歌仔戲、布袋戲用語）、出場、出廳（古例，新婚第三日，新娘才出來到大廳拜祖先、見ta-ke-kuann）、出世[tshut-sì]（出生个意思，佮佛教講个「出世 tshut-sè」指離開世俗，是相反个動詞概念。）、出海、出山（出去到「山頭」，山頭是指墓仔埔，台語「出山」是指「出葬」）。

二、out of it 个例：出厝（俗語：在厝賤、出厝貴）、出喙、出監[kann]、出家[ke]、出轎、出岫[siū]、出lam、出運（脫出歹運）。

「出境」是對本境出去外境； 「出國」是對本國出去外國。總是，佇遮我猶原將即兩詞歸佇 out of it，將字面意思分析做「出本境」「出本國」。

三、through it 个例：出關（指海關，無論出國、回國，攏愛出關）、出札口[tsat-kháu]（指火車頭个鉸票口，無論欲去月台上車，抑是到站欲離開車頭，攏愛出札口）。

其實「出+名詞」閣有足濟用法，像「出手、出錢、出日、出聲……」這佮以上个情形無仝。