「蓬萊米」「城隍廟」个台語變調

「蓬萊米」是日本儂號名个，怹唸日語音 ほうらいまい，台語儂就照字唸台語音 Hông-lâi-bí。若是當今華文才按呢號，台語儂恐驚就袂曉唸囉。

論到 Hông-lâi-bí 實際个呼音，也有一个曲折[khiok-tsiat]，就是真濟台灣儂平常講話，第五聲變調是變中調（偏漳腔），但是 Hông-lâi-bí 第一字慣勢變低調（偏泉腔），像阮就按呢講。問題是，「蓬」「萊」兩字攏是第五聲，攏愛變調，但是阮第一字「蓬」變低調，第二字「萊」煞變中調，形成一種也心適、也龜怪个漳泉濫。

即種現象是好、是䆀，且無論，總--是，咱若透過教育體制來進行台語文教育，扑算會減少即種現象。

毋但「新」語詞是按呢，連古早詞「城隍廟 Sîng-hông-biō、城隍爺 Sîng-hông-iâ」，阮嘛是第一字變低調，第二字變中調。

教育部台語辭典提供个真儂呼音，「蓬萊米」个變調，佮我仝款是漳泉濫；但是「城隍、城隍廟」就照漳腔變調。

另外，在早台語儂个查埔名真愛用「城」字來號，像「金城、坤城、明城……」我聽袂少儂攏唸做白話音 siânn，無唸文言音 sîng。唸 siânn 是佮「成」字較好分，總是，無合台語儂較文雅个名唸文言音个大原則。各位若本身个大名有「城」字，愛請恁賜教，看即字恁按怎唸。多謝。