台語否定詞「免、毋免、無啥免」

台語講「免 bián」，著是華語「不用、不需要」。但是「免」頭前閣加一个否定詞「毋 m̄」，講「毋免」，猶原是「免」个意思，毋是負負得正！不過，講「毋免」口氣卡軟。

閣有一種講法「無啥免 bô-siánn-bián」，意思是「無一定愛」、「無啥需要」（雖然「免」佮「需要」明明是相反个意思），有時是確實感覺無足需要，有時是婉轉表達講毋免麻煩，閣去做啥乜代誌。華語是「不太需要」。「無啥免」比講「毋免」，表達無愛个口氣閣愈婉轉。

「無啥免」是先父在生三不五時會講著个話，凡勢有袂少朋友恁無按呢講，總是，這是我个父母話、故鄉話。我即个無某無囝个出外儂，只好利用網路來共伊傳播落去。

「無，to免--lih」（to 變調變第七聲，句尾 lih 低調輕聲），定定用來半講笑，予儂知影咱有佮意接受對方个好意，但是又閣有一點仔歹勢歹勢。

「無，to̍h免」（to̍h 變調變第三聲），是講，若無，著毋免閣麻煩，去咧走傱[tsáu-tsông]、設法。