台語問答：〔我的興趣是跑步〕台語按怎講？

問：請教一下，華語〔我的興趣是跑步〕，即句話个〔跑步〕台語愛按怎講？若是講「我个興趣是走[tsáu]」，只用一字「走」，感覺無自然。

答：有儂認為華語〔跑步〕（個人健康運動，毋是比賽），台語就講「走走咧[tsáu-tsáu--leh]」。

但是華語〔我的興趣是跑步〕，台語若講做「我个興趣是走走咧」按呢語法不通，講「我佮意有閒就去走走咧」才會通，這有包含「慢跑運動」。

若是較有強度个運動訓練，就講「我个興趣是練走[liān-tsáu]」、「我个興趣是練走標[liān tsáu-pio]」、「我興趣練走標」（「趣」愛變調）、「我興趣走標」（「趣」愛變調）攏會用得。

南部講个「走標」無限定比賽，家己平素為家己健康咧走，不管走緊走慢，攏會使講。

「走標」个語源是原住民風俗，毋是逐所在个台語攏有按呢講，但是值得逐家吸收來用。 參考拙文〈〔賽跑〕台語有講「走標」〉

其他佮走標運動相關个用語，提供予讀者活用：

半行走[puànn-kiânn-tsáu]、健走[kiān-tsáu]
寬仔走[khuann-á-tsáu]、慢走[bān-tsáu]
短跑[té/tuán-pháu]、長跑[tn̂g-pháu]
ma-lá-sóng（marathon）、走ma-lá-sóng

兩儂以上个比賽：走相逐[tsáu-sio-jiok]、相賽走[sann-sè-tsáu]、走相拚[tsáu-sio-piànn]、走鬥贏[tsáu-tàu-iânn]、鬥𠢕走[tàu-gâu-tsáu]

台語「跑 pháu」比「走 tsáu」較強調「衝刺」，像「跑車」、「即隻馬真gâu跑」。