本文
咱知影吳樂天先生自戒嚴時期開始講廖添丁个古，因為毋敢公然批評中國黨，一直攏是用廖添丁所對抗个日本儂來暗射中國黨。吳樂天家己變做廖添丁个化身，所以伊定定佇節目開始个時，強調伊是標準漢人，伊所講个是標準漢語。
總--是，咱儂若爭取欲做標準漢人，咱儂話欲做標準漢語，就是佇台灣地向中國大陸幾若億講「普通話」个儂相爭正統。按呢煞完全呼應中華民國向中華人民共和國爭正統个關係，事實攏碰壁[pōng-piah]，國際上無儂𫝺[hiù]--咱。
台語文界有寡先進，也是長期播揚一个觀念講台語是純漢語（堅持用「河洛話」个寫法），抑北京華語是雜種胡漢語。按呢等於是設定一種階級關係，就是漢語比胡語高貴，抑漢語中个台語又閣比北京語高貴，因為血緣成分較純。
南方个漢語，像閩台語、客語、粵語，到今確實攏保存真濟古漢語个成分，彼佇北方漢語老早就失落去。總是，中國个土地無迄號純種个漢人、抑是純種个漢語。留佇北方个漢人，有濫著胡人个血統佮語言；抑 走反 落「南蠻」个漢人，幾千年來也有濫著南方百越民族个血統佮語言。
唐山過台灣个漢人，閣進一步濫著台灣原住民个血統佮語言。
甚至有真濟百越民族、台灣原住民，嘛因為文化語言予漢人征服、同化，煞相信家己是純漢人。
爭取家己才是漢族純種、才是漢語正統个態度佮做法，終其尾只是咧維護中華帝國繼續反民主、反平等，用建立佇階級意識型態个壓霸步數，來欲維持一个又閣久長、又閣曠闊个帝國主義政體。
若有心欲建立台灣國，一定愛扑破尊漢賤胡（番）个心態，若無，佇當今台灣猶原是咧代理中華帝國，來輕視蹧躂台灣原住民。
我無反對用新眼光來用台語讀經典古漢文，但是毋是用歧視非漢人、非漢語个心態。
面冊網誌留言
Tōo Sìn-liông Asam UT
『總是，中國个土地無迄號純種个漢人』，頂禮拜六聽阿仁老師演講伊嘛是按呢講。『漢』現今來講應該是一種集合名詞，我e看法嘛是按呢。
Zǔnzhǐ Ci
客語是畬（蛇）語 變過來 自古七閩八閩 山哈是蛇後代
曾火旺
樓頂徐先生，應該是客家人，有呰款認識，真是博文多學。
Úihim Khu
「漢人」是政治名詞–o͘h！
張阿天
畲人抗支那抗か明囯時代、了後大部份「漢化」去、変做「客人」。了後囝孫こ过台湾在台湾抗清抗日抗中華。〔我知影茲是少数个情形。〕
張阿天
Khu Úi-him、我まれ好玄、若二百冬前个日本册、咁寫「唐人」？「支那人」？抑是「漢人」？
Zǔnzhǐ Ci
解構咱儂 梳理脈絡 咱是新台灣儂
Andy Chen
Hoh8-ló話百面事先是胡話，尾ciah去濫著漢話。
Tó一層是事先層，著看詞源ê分佈。
名詞khah koe7去tòo著別人ê話，副詞動詞連詞khah boe7 ánni。Ce算是語言透濫ê規律，名詞khah tangible。
Hoh8-ló話確實大部份是漢話。總是漢話是後來層。準講99.99999%是漢話，hoh8-ló話ma7無算是漢話ê kang7族。
英文ê詞lui7分佈就是latin文佔大面，但是英文永遠是german語族。
潘科元
「名詞khah koe7去tòo著別人ê話，副詞動詞連詞khah boe7 ánni」針對Ho̍h-ló話，毋知咁有統計資料，符合即句通例，證明閩台語个「tāi先層」是「胡話」？
Zǔnzhǐ Ci
【純 、標準】應該攏是一元化介思考 。
張阿天
潘先生、m̄ cai lí kám bat 讀过潘悟云〈漢語方言的歷史層次及其类型〉？
Uinn Le-hioh 看潘老師的PO文，就敢若佇讀研究所咧。
Andy Chen
潘悟雲〈漢語方言ê歷史層次及其类型〉確實是「正視聽」ê好文，直接共「漢話皆同源」ê漚思想拍破，提出「漢話方言m̄是愈變愈遠，是愈行愈倚。m̄是漢話無細膩去濫著胡，顛倒是漢文化ê cultural assimilation ê力量第一強，胡話hō·漢化了了」。
nāⁿ 有針對Ho̍h-ló話ê統計資料講事先是胡話，世間就無hiah cōe人堅持講Ho̍h-ló話是「hô-lo̍k-ōe」。beh做，著lán來做。總是，看khah簡單ê例，台語借日語ê攏總名詞，是名詞kōe借。無「漢字」个台語，亦是動詞、副詞cōe過名詞。若是漢話去濫著胡話，台語ê疑難字，照講是名詞佔大面ciah著。
張阿天
* CULTURAL ASSIMILATION = 文化方面个同化
潘科元
安德烈先生，歡迎轉貼。但是我寫了真粗淺。
潘科元
Andy, 「顛倒是漢文化ê cultural assimilation ê力量第一強，胡話hō·漢化了了」，有影。
Comments powered by Disqus.