台語四字名詞个變調規則，毋是像一寡台文老師所想个遐簡單講「前三字一律變調、尾字本調」，怹有儂根據校名【台灣大學】个變調法，一支竹篙壓倒一船儎[tsāi]，認定所有个四字名詞攏著按呢變。
台語四字名詞个聲調變化，其實牽涉著語詞結構、文白生熟、緊慢節奏等等複雜个因素。
像「中華民國」我細漢閣時常聽著長輩講【中華#民國#】Tiong-hua1# bin5-kok#，也就是切做兩段來唸，毋但第四字唸本調，中央第二字也是唸本調第一聲。
補充：「華」字本調唸第一聲，現今愈來愈少台語儂知影，以前有讀過漢文个儂就知即个「華」往往是佮「花」字互通，所以也會使得唸第一聲 hua，佮「花」文音仝款。
後來【中華#民國#】即種兩段式變調法愈來愈少，多數儂唸熟，就慣勢連讀變調，唸做【中華民國#】Tiong-hua-bin5-kok# 只有尾字才本調。
今[tann]來比較兩个詞「北回歸線」佮「北迴鐵路」。「北回歸線」个語詞結構是先有「回歸」，才加「線」，形成「回歸線」，最後才閣加詞頭「北」，成做「北回歸線」，意思是佇一年間，日頭直射地球个點會南北變動，到咱儂夏至个時，拄好離赤道上遠，即種佇北半球个想像點，連起來所成个想像線，就是「北回歸線」。
照伊个語詞結構來論，就無適合唸做【北回#歸線#】，但是也無應該唸【北#回歸線#】，這愈無自然，所以猶原是【北回歸線#】。
若是「北迴鐵路」个構詞是「北迴＋鐵路」，一開始唸【北迴#鐵路#】我認為完全合理，生疏个新名詞著唸較慢，本調个所在較濟，按呢唸上好理解，一旦唸久變熟語，講【北迴鐵路#】就真自然。
台語氣象，報幾十年久，「北部地區」「南部地區」iáu是攏用兩段式變調，第二字【部】唸本調，這我看是無妥當，唸【北部地區#】【南部地區#】較自然。
比較華語：其實華語嘛是有變調，上明顯个是華語「第三聲＋第三聲」个時，頭前个第三聲愛變第二聲，像「海水」「感想」「網友」（佮「亡友」變仝音）……。問題是三字詞若攏第三聲，就著分析語詞結構，像【總統府】是【總統+府】，所以【總統】先家己變一擺，成做ㄗㄨㄥˊ ㄊㄨㄥˇ，【總】會變第二聲，了後結合【府】，按呢ㄊㄨㄥˇ拄著ㄈㄨˇ也著愛變第二聲，最後就是ㄗㄨㄥˊ ㄊㄨㄥˊ ㄈㄨˇ，前兩字攏愛變第二聲。
但是【馬總統】就無仝，伊个語詞結構是【馬+總統】，【總統】兩字先結合變調了後，【總】已經變成第二聲矣，等到【總統】佮【馬】進一步結合做三字詞，第三聲个【馬】所拄著个是已經變調過个【總ㄗㄨㄥˊ】，所以【馬】無應該變第二聲，著愛唸做 ㄇㄚˇ ㄗㄨㄥˊ ㄊㄨㄥˇ（嚴格講起來【馬】是唸「半上聲」），毋是ㄇㄚˊ ㄗㄨㄥˊ ㄊㄨㄥˇ（麻總統）。
Comments powered by Disqus.