台語慣用語「佮儂有長短」

台語小測驗：

「怹家後佮儂有長短」[in ke-āu kah lâng ū-tn̂g-té]，請問即句話是講某乜儂怹某按怎？
(1) 佮別儂冤家。
(2) 討契兄。
(3) 佮別儂相欠數[siàu]。
(4) 佮別儂比較，有優點也有缺點。

解答：高級台語「佮儂有長短」[kah lâng ū-tn̂g-té]，是指佮儂相欠數[siàu]，有債務關係，尤其是最後清算起來，猶閣欠儂錢个情形，按呢講是一種真雅氣的表達法。

無論是台日大辭典个解說，抑是阮父母佇生活中實際个用法，「佮儂有長短」攏是指債務關係。

有先進望文生義，認為「佮儂有長短」，應該包括人生各種个紛爭。在我想，百姓話語个解說應當尊存實際使用者个意義佮用法，客觀來記錄，這是語言工作者个基本事工。若是文字創作者欲做哲學性个聯想、引申佮發揮，當然值得肯定、支持，總是，這屬佇別款智識活動。

語言學，佮文學，是兩種學問。