台語文修辭：修飾名詞个關係子句毋通傷長

先用華語句舉例：〔當那個曾經與我海誓山盟，卻為了一個富家女狠心棄我而去的男人再度出現在我面前時，我已不認得他〕。現代中文因為受外語語法影響，袂少作家足愛採用lò-lò長个關係子句來修飾名詞，予儂讀甲強欲無氣。例句中，字體加粗个部份〔曾經與我海誓山盟，卻為了一個富家女狠心棄我而去的〕就是迄種關係子句，子句尾用〔的〕來連結所修飾个名詞。

即个例句早就變做是真正常个，一般華文讀者攏慣勢慣勢，袂嫌矣。

但是我咧寫台語文，對這真敏感，看著台文寫作者對華文學著即種表達法，真袂做得。因為這違反台語自然口語个語感，欲讀、欲聽攏真食力。我常在建議，愛盡量將即種修飾性个關係子句創較短咧，無，就徙去後壁，無，就拆做幾若个短句，加用一寡標點來分予明。

英語个關係子句會使自由寫較足長，因為伊个關係子句是後位修飾，先將主體 the man 講出來，才用關係代名詞 who 接紲落去寬寬仔說明。但是漢語个關係子句愛囥頭前，一旦講甲傷長，最後講到〔的〇〇〕个時，聽話者規个頭殼攏gông去矣。比較：

台語寫法 1：「當[tng]迄个捌佮我山盟海誓，煞為著一个富家女，梟雄[hiau-hiông]放捒我个查埔儂閣再出現佇我个面前个時，我已經袂認--得--伊--矣。」

台語寫法 2：「有一个查埔儂，捌佮我山盟海誓，煞為著一个富家女，梟雄來放捒我。當伊閣再出現佇我面前，我已經袂認得伊矣。」

台語寫法 3：「有一个查埔儂，共我講汝無嫁我無娶，煞去亄[it]著儂个千金小姐，梟心做伊去。伊閣佮我相搪[sio-tn̄g]个時，我已經袂認得伊矣。」

長-ló-ló个文句，有時予儂掠做是邏則性較強，較連貫，因為用較濟虛詞連做一大捾。其實只要實詞个意思講有清楚，一句一句接有好勢，免的確著用遐个虛詞去連，規段个意思就真明朗[bîng-láng]。